Il-Maġistrat Rachel Montebello ordnat biex każ kontra raġel fuq vjolenza domestika jkompli minkejja li s-sieħba tiegħu qalet li riedet twaqqa’ l-akkużi fil-konfront tiegħu li kienet għamlet għax issa m’għadux vjolenti u qata’ l-vizzju tax-xorb. Il-Qorti ppressat ħafna lill-allegata vittma minħabba biex tgħid il-verità kollha wara li qalet li kienu nfirdu biss għall-ġurnata u li saħansitra mill-għada li għamlet ir-rapport kontrih kienet reġgħet bdiet iċċempillu.
Minkejja din ix-xhieda favur ir-raġel li kien instab ħati wkoll f’Qorti ġewwa Ragusa fuq akkużi differenti, l-Qorti deherilha li s-sieħba tiegħu ma kinitx konsistenti fix-xhieda tagħha fejn saħansitra talbet lill-Kummissarju tal-Pulizija biex jinvestiga x-xhieda tagħha.
Il-mara li hija mir-Rabat talbet lill-maġistrat biex twaqqa’ l-akkużi kontra s-sieħeb tagħha wara li f’seduta preċedenti rrifjutat li tixhed kontrih. Kien l-Avukat tal-akkużat Kris Busietta li qal lill-Maġistrat Rachel Montebello li l-allegata vittma kienet marret tkellmu u qaltlu li tixtieq li twaqqa’ l-każ.
Fuq il-pedana tax-xhieda hija qalet li ilha f’relazzjoni mal-akkużat għal seba’ snin u ma rawx lil xulxin biss għal ġurnata wara l-inċident li seħħ f’Diċembru. Il-Qorti staqsietha jekk kienitx qed tixhed b’dan il-mod min rajha, mingħajr pressjoni ta’ xejn, u hi wieġbet fl-affermattiv.
Hija qalet li s-sieħeb tagħha mar Għawdex biex jagħmel il-programm ta’ rijabilitazzjoni mill-vizzju tal-alkoħol u qalet li kienet titla’ żżuru tista’ tgħid kuljum. Il-Qorti staqsietha jekk għandhiex bżonn il-protezzjoni, jekk tħosshiex sigura mal-akkużat u jekk hijiex konxja li jekk twaqqa’ l-kawża ma tistax terġa’ tiftaħha, xi ħaġa li hi ħasbet li tista’ terġa’ tibda proċeduri.
Hawn il-Qorti qaltilha; “tidher m’intix ċerta” bil-mara tistaqsi x’jiġri jekk tinqala’ xi ħaġa oħra u l-Maġistrat Montebello wieġbet billi staqsietha r-raġuni għax kienet qed tistaqsiha dik id-domanda. Il-Maġistrat staqsietha għal darba oħra hijiex tħossha sigura mal-akkużat u l-mara wieġbet li r-raġel mar il-quddiem dwar il-mod ta’ kif jaġixxi fil-konfront tagħha.
Mistoqsija jekk kienx hemm xi inċidenti oħra, il-mara qalet li dan kien l-ewwel inċident. Madankollu meta l-Ispettur Audrey Micallef li taħdem fi ħdan it-Taqsima tal-Vjolenza Domestika fakkritha li kienet ħadet ġurament, hija wieġbet li kien hemm każ ieħor. Hawn il-mara deheret inċerta fuq il-pedana tax-xhieda u qalet “Kien hemm każ ieħor, imma….” .
Il-Maġistrat Montebello ġibditilha l-attenzjoni li meta staqsietha kienx hemm każijiet oħra hija qalet li le u għamlitha ċara li ma kinitx konvinta mir-risposta tagħha fuq jekk kinitx imbeżża’ mis-sigurtà tagħha fil-futur. Meta qieset il-fatt li l-mara kienet inkonsistenti fix-xhieda tagħha, l-qorti ma laqgħetx it-talba tal-vittma biex twaqqa’ l-każ u talbet lill-prosekuzzjoni biex tmexxi bil-każ tagħha fis-seduta li jmiss.
Qabel ma ddifferiet il-każ għal Jannar il-Maġistrat Montebello talbet lill-Kummissarju tal-Pulizija jinvestiga lill-mara biex jara jekk xehditx falz, u jekk iva titressaq il-Qorti akkużata bi sperġur.
