Il-President Ukren, Volodymyr Zelensky, qal li l-poplu tiegħu se jkompli jisfida lir-Russja b’aktar determinazzjoni minn qatt qabel minkejja li l-belt kapitali ta’ Kiev spiċċat b’70 fil-mija anqas mill-provvista tad-dawl b’kaġun tal-missili tal-qawwiet tal-Kremlin.
U waqt li Kiev mill-ġdid spiċċat fil-mira tar-Russi, baqa’ għaddej ix-xogħol intiż għar-restawr tal-provvista tal-ilma għar-residenti – bl-attakki tal-qawwiet tal-Kremlin fuq il-faċilitajiet tal-enerġija fl-Ukrajna qed iwasslu għal aktar blackouts tul il-pajjiż.
Is-Sindku ta’ Kiev, Vitali Klitschko, qal li l-kumpanniji tal-enerġija kienu qed jippruvaw jirristawraw il-provvista mill-aktar fis possibbli u li dan kien jiddependi ‘miċ-ċirkustanzi tal-gwerra’.Fl-istess ħin, il-ħidma qed tixbaħ ġlieda mal-ħin, meta x-xitwa qabdet sew fl-Ukrajna fost l-inżul tal-borra u temperaturi taħt iz-zero.
Filwaqt li l-parti kbira ta’ Kiev spiċċat litteralment fid-dlam matul il-lejl, ħafna residenti qed jitrattaw il-postijiet tax-xogħol daqslikieku refuġju mill-kesħa, Dan peress li l-bini inkwistjoni – kuntrarju għad-djar tagħhom – għad għandhom sistemi għall-ġenerazzjoni tas-sħana.
Hu minnu wkoll li r-residenti ta’ Kiev qed jidhru determinati li jisfidaw lir-Russi waqt li jfittxu s-soluzzjonijiet għall-problemi – anki jekk id-dawl u l-ilma mgħadhomx iggarantiti għalihom matul il-ġimgħat u x-xhur li ġejjin.
Intant, il-President Zelensky kiteb fuq il-media soċjali li ‘id-dawl bilfors irid isegwi d-dlam’ u li ‘il-Gvern u l-Armata tar-Russja qatt mhuma se jifhmu dan għaliex huma iridu li jeżistu fi stat ta’ dlam permanenti’.
