Uffiċjal tal-pulizija li rrapporta lil tlieta mill-kollegi tiegħu talli allegatament aggredixxew persuni qal fil-Qorti kif ma setax jorqod wara li sar jaf bl-allegata mġieba tagħhom. Is-Surġent Nathan Zerafa qal fil-Qorti kif l-ewwel kien sema’ ħjiel dwar l-allegati attakki waqt li kien qed jaħdem fil-grawnd Victor Tedesco fit-2 ta’ Ottubru.
Tliet uffiċjali fuq ix-xift tax-xogħol tiegħu kienu qajmu s-suġġett, u taw ħjiel li xejn ma kienx tajjeb waqt ix-xift ta’ billejl fl-għassa tal-Ħamrun. Huma semmew tliet uffiċjali tal-pulizija u dehru jimplikaw li kienu wara ċerti abbużi li kienu qed iseħħu.
Zerafa qal li l-għada, huwa kien qajjem il-kwistjoni ma’ tliet uffiċjali oħra, li qalulu li tlieta mill-kollegi tagħhom tax-xift ta’ bil-lejl kienu se jarrestaw ċerti persuni, jieħduhom f’post f’Ħal Qormi u “jużaw il-forza fuqhom”. Zerafa kien qed jixhed fil-kumpilazzjoni tal-provi kontra l-kuntistabbli Rica Mifsud Grech ta’ 22 sena, Luca Brincat ta’ 20 sena u Jurgen Falzon ta’ 24 sena li jinsabu akkużati li ħatfu ċittadini barranin waqt ix-xift ta’ billejl tagħhom biex isawtuhom u jabbandunawhom f’wied imwarrab ta’ Ħal Qormi.
Huwa qal lill-Qorti li kien inkwetat ħafna wara li sema’ dwar is-swat. Kollega li kien sar jaf bl-abbuż ukoll kien inkwetat. Zerafa u l-kollega tiegħu mbagħad tkellmu mas-superjuri tagħhom, żewġ spetturi, li ħeġġuhom biex jirrappurtaw il-kwistjoni immedjatament lill-professional standards unit fi ħdan il-korp.
“Bażikament, sakemm ma nagħmlux hekk, kienu jagħmlu dan huma stess,” kompla Zerafa. Għalhekk hu u sieħbu s-Surġent bagħtu email, fejn iddeskrivew id-dettalji bażiċi u talbu appuntament. Ix-xhud identifika dik l-email li ntweriet lilu fil-qorti.
Dik l-email tat bidu għall-proċess li wassal għall-arrest tat-tliet suspettati, li issa qed iwieġbu mhux ħatja tal-akkużi. Waqt l-interrogazzjoni, Falzon kien fakkar xi ħaġa dwar l-inċident tal-5 ta’ Settembru iżda ċaħad li kien hemm xi swat ta’ immigrant involut.
Mifsud Grech ma weġibx il-mistoqsijiet pertinenti, filwaqt li Brincat kien għażel li ma jwieġebx, xehed l-Ispettur Joseph Mercieca. Aktar kmieni waqt is-seduta, il-Qorti semgħet lill-uffiċjali jixhdu li wieħed mill-irġiel allegatament imsawwat mill-akkużat kien “kalm” u ma kkawża “l-ebda problemi” fil-ħin tal-arrest tiegħu.
Ċittadin Somalu Ahmed Ali Abduwili xehed waqt is-seduta ta’ qabel li f’lejl ta’ Settembru kien miġbur f’karozza tal-pulizija, immanettjat u mbagħad ittieħed f’post mudlam “il-bogħod min dik li sejħilha awtostrada.” Ir-raġel saħaq li f’dik l-okkażjoni kien imsawwat minn erba’ uffiċjali, mhux tlieta, u dan jimplika li kien hemm aggressur “misteru”.
Il-Qorti semgħet ukoll kif aktar kmieni dakinhar, Ali Abduwili kien spiċċa fl-inkwiet talli kisser it-tieqa ta’ ħanut tal-Marsa. Tliet uffiċjali li dakinhar fil-5 ta’ Settembru filgħaxija wieġbu għal telefonata li kien inqala xi nkwiet fit-Tiger Bar fil-Marsa xehdu li Ali Abduwili kien avviċinahom meta waslu, u qalilhom li x’aktarx kienu qed ifittxuh.
Imbagħad tela’ fil-karozza tal-pulizija u eventwalment ittieħed l-għassa tal-Ħamrun. Kien kalm tul it-triq kollha lejn l-għassa fejn l-uffiċjali mbagħad għaddewlu f’idejn uffiċjali oħra li kienu qed jaħdmu dak il-ħin. “L-attitudni tiegħu kienet tajba,” xehed wieħed mill-uffiċjali.
Il-każ ikompli f’Diċembru. Il-qorti hija ppreseduta mill-maġistrat Joe Mifsud. L-Ispettur Omar Zammit mexxa wkoll il-Prosekuzzjoni, assistit mill-avukat tal-AĠ Kaylie Bonnett. L-avukati Veronique Dalli u Dean Hili huma avukati ta’ Mifsud Grech. L-avukati Franco Debono u Francesca Zarb huma qed idhru għal Brincat. L-avukat Edmond Cuschieri huwa l-avukat ta’ Falzon.
