F’Ġunju 2022, 135 tabib qajmu protesta ġudizzjarja kontra l-gvern dwar il-projbizzjoni ġenerali attwali dwar l-abort. Huma ħassuhom aggravati minħabba l-inkapaċità tagħhom li jipprovdu kura f’waqtha lill-pazjenti tqal. Madankollu, l-Assoċjazzjoni Medika ta’ Malta (MAM) tiddikjara li l-emenda proposta dwar it-tmiem tat-tqala f’każijiet ta’ theddid għall-ħajja jew kwistjonijiet serji ta’ saħħa qatt ma ntalbet mit-tobba u mhux se tgħinhom.
Fi stqarrija maħruġa minn Doctors for Choice, Aditus. Allied Healthcare for Choice, Integra, Isles of the Left, Moviment Graffitti, Young Progressive Beings, Women’s Rights Foundation, Men Against Violence u Malta Humanist Association qalu li l-protesta, ippreżentata aktar kmieni din is-sena, ġiegħlet lill-Prim Ministru u lill-Ministru tas-Saħħa jirrevedu l-liġi attwali li tipprojbixxi t-terminazzjoni tat-tqala taħt kwalunkwe ċirkostanza, inklużi raġunijiet mediċi serji. Barra minn hekk, il-liġi preżenti tikkundanna lit-tobba li jgħinu lin-nisa jagħmlu l-abort għal massimu ta’ erba’ snin ħabs. Bil-liġi jittieħed ukoll il-warrant professjonali tat-tobba.
L-istqarrija tkompli tgħid li l-MAM injorat it-tħassib ta’ aktar minn 100 tabib, li ħafna minnhom huma membri tagħha stess, li jħossuhom aggravati li ma jistgħux joffru prattika tal-aħjar evidenza lill-pazjenti tagħhom kif inhu rakkomandat minn linji gwida mediċi internazzjonali. Dan id-dewmien ikompli jpoġġi l-ħajja u s-saħħa ta’ persuni tqal fil-periklu u jkompli jfixkel lit-tobba milli jagħmlu xogħolhom fil-ħin.
Jisħqu li l-emendi proposti mill-gvern se jgħinu lit-tobba jipprovdu lill-pazjenti tagħhom l-aħjar kura tas-saħħa possibbli meħtieġa fis-sitwazzjoni. L-abbozz propost se jneħħi r-riskju ta’ prosekuzzjoni kriminali tat-tobba jekk tqala jkollha tintemm biex tipproteġi l-ħajja jew is-saħħa ta’ mara. Filwaqt li nifhmu li t-tobba ilhom iwettqu t-terminazzjoni tat-tqala f’każi ta’ riskju għall-ħajja, il-liġi preżenti toħloq effett tal-biża’, u ma tħallix lit-tobba jieħdu azzjoni malajr. Id-dewmien f’każijiet bħal dawn huwa għad-detriment tal-pazjent.
L-istqarrija ttem tgħid li l-kriminalizzazzjoni tat-tobba ma għamlet xejn biex tgħin lil dawn il-pazjenti s’issa. L-emenda tiżgura li l-pazjenti ma jibqgħux jisimgħu li jdejn it-tobba huma marbutin meta jkollhom bżonn isegwu linji gwida internazzjonali filwaqt li jipprovdu kura tas-saħħa. Minflok, se tagħmel lil Malta post aktar sigur għall-pazjenti Maltin u l-familji tagħhom.
