Fi Houston, mixgħela mal-bini ewlieni bil-kuluri blu u aħmar biex ifakkru l-wasla tal-plejer tal-basketball Amerikana Brittney Griner li nħelset mill-ħabs fir-Russja bi bdil mat-traffikant tal-armi Russu Victor Bout ta’ 55 sena magħruf bħala ‘Negozjant tal-Mewt’.
Bout kien qed jiskonta 25 sena ħabs fl-Istati Uniti fuq traffikar ta’ armi. L-aħbar tal-ħelsien ta’ Brittney Griner ingħatat mill-President Amerikan Joe Biden flimkien mal-vici President Kamala Harris u mart Griner, Cherelle Griner. Brittney Griner, stilla tal-basketball fl-Istati Uniti ma’ Phoenix Mercury u plejer fi ħdan it-tim Nazzjonali, rebħet żewġ midalji tad-deher fl-Olimpijadi.
Hija kienet akkużata li waqt mawra fir-Russja mat-tim Amerikan disa’ xhur ilu , kellha fil-pussess tagħha kontenituri tat-tipjip artificjali li kellhom taħlita ta’ cannabis. F’Awwissu ta’ din is-sena ingħatat sentenza ta’ disa’ snin priġunerija.
