L-Arġentina se tkun qed tilgħab it-tieni finali fl-aħħar tliet edizzjonijiet tat-Tazza tad-Dinja. B’dik li tista’ titqies bħala l-aħjar prestazzjoni tagħhom f’din l-edizzjoni, huma xejnu l-oppożizzjoni Kroata.
Għall-Kroati sfaxxat il-possibbiltà tat-tieni finali konsekuttiva. Minkejja r-riżultat finali, Zlatko Dalic xorta għandu jkun kburi bit-tim tiegħu li wasal mal-aħħar erbgħa kontra dak li ħafna pprevedew. Iżda fil-ġurnata kienu inferjuri għall-Arġentini. Il-Kroati kellhom aktar pussess fl-ewwel parti tal-ewwel taqsima iżda l-Arġentini bdew jidħlu aktar fil-logħba sakemm wasal l-ewwel gowl.
L-ewwel tentattiv perikoluż tal-logħba wasal wara 25 minuta. Julian Alvarez prova b’xutt fil-baxx indirizzat għar-rokna xellugija ta’ Dominik Livakovic iżda l-gowlkiper irnexxielu jdawwar f’korner fil-ħin.
Din l-azzjoni kienet il-preludju ta’ dak li kien se jseħħ seba’ minuti wara. Alvarez ħa vantaġġ minn difiża żbilanċjata, sab l-ispazju u rċieva ballun quddiemu. L-attakkant avvanza u ġie f’kuntatt ma’ Livakovic li deher jostakolah fil-kaxxa, bir-referee Daniele Orsato ordna penalty. Inkariga ruħu s-solitu LIONEL MESSI li skorja b’xutt preċiż fin-naħa leminija tiegħu.
Dan il-gowl ħasad ftit lit-tim ta’ Zlatko Dalic hekk kif wasal kontra x-xejra tal-logħob. Iżda l-Kroati lanqas laħqu ġew f’tagħhom li ma sofrewx it-tieni gowl fid-39 minuta. Din id-darba kien korner tal-Kroazja, il-kross ta’ Marcelo Brozovic ġie mxellef u beda kontrattakk Arġentin.
Messi għadda lejn JULIAN ALVAREZ f’nofs grawnd, l-attakkant avvanza u għal darba darbtejn il-ballun ma kienx imbiegħed mid-difiża Kroata, b’Alvarez jispiċċa quddiem Livakovic u xeħet fix-xibka.
L-iskor saħansitra seta’ sar 3-0 erba’ minuti wara iżda Livakovic kien attent biex salva tajjeb daqqa ta’ ras ta’ Alexis MacAllister minn korner. L-uniku reazzjoni tal-Kroazja waslet qabel tmiem l-ewwel taqsima. Kross mil-lemin ta’ Josip Juranovic ġie mxellef għal-lasta u l-gowlkiper Emiliano Martinez salva parzjalment, b’Andrej Kramaric ma jirnexxilux iżomm il-ballun fil-pitch.
Il-kowċ Kroat għamel żewġ bidliet fil-ħin tal-mistrieħ bl-introduzzjoni ta’ Mislav Orsic u Nikola Vlasic filwaqt li Bruno Petkovic daħal flok Marcelo Brozovic ftit wara.
Messi prova jkabbar il-vantaġġ fit-58 minuta meta ħabbat il-ballun ma’ Alvarez iżda x-xutt finali ġie salvat minn Livakovic. Iżda l-Albiceleste għalqu l-logħba fis-70 minuta. Azzjoni tipika ta’ Messi fuq il-lemin, bidel id-direzzjoni diversi drabi qabel dar ma’ Josip Gvardiol u tefa’ kross fil-baxx lejn JULIAN ALVAREZ li kellu bżonn biss jixħet il-ballun fix-xibka.
