Uffiċjal tal-pulizija nqabad minn fuq camera jimbotta persuna ta’ ġilda skura li kien miexi għall-affari tiegħu fi triq kwieta u wara tefgħu ma’ l-art u beda jsawwtu sakemm intervjenew żewġ uffiċjali oħra. Dan ħareġ minn xhieda li nstemgħet il-Qorti.
Fill-fatt dettalji ta’ dak l-episodju vjolenti ħarġu f’seduta tal-qorti li tikkonċerna tliet uffiċjali tal-pulizija li jinsabu akkużati li ħatfu ċittadini barranin u mbagħad aggredewhom. Il-Kuntistabbli Rica Mifsud Grech ta’ 22 sena mill-Floriana, Luca Brincat ta’ 20 sena minn Ħal Qormi u Jurgen Falzon ta’ 24 sena, residenti Santa Venera huma allegati li għażlu immigranti “b’mod każwali” li jkunu fit-toroq, ħaduhom f’postijiet imwarrba u mbagħad bdew isawwtuhom u abbandunawhom.
L-allegazzjonijiet ħarġu fil-beraħ meta nkixfu minn tliet sħabhom pulizija mill-għassa tal-Ħamrun. L-espert tal-informatika Keith Cutajar qal lill-Qorti kif analizza apparat elettroniku tat-tliet akkużati, kif ukoll filmati ta’ CCTV minn diversi postijiet qrib iż-żoni fejn seħħet l-allegata vjolenza.
Video clip bħal dan ittieħed minn maħżen fi Triq it-Tigrija, il-Marsa u wera karozza tal-pulizija qed issuq ħdejn raġel ta’ ġilda skura li kien miexi mal-bankina. Uffiċjal imbagħad joħroġ u jersaq lejn ir-raġel fit-triq pjuttost kwieta. Il-pulizija l-ewwel ikellem lir-raġel iżda mbagħad f’daqqa waħda l-inċident evolva “f’aggressjoni pjuttost allarmanti,” qal ix-xhud.
Il-filmat juri lill-uffiċjal imbotta f’daqqa lill-immigrant f’nofs it-triq u jagħtih daqqa ta’ ponn. L-allegat vittma waqa’ mal-art, qal Cutajar. ‘Stills’ minn dak il-filmat meħud minn diversi angoli wrew żewġ uffiċjali oħra jidħlu biex iwaqqfu lill-kollega tagħhom milli jkompli bil-vjolenza.
Id-deskrizzjoni ta’ dak l-episodju qanqlet xi oġġezzjonijiet mid-difiża, li sostniet li l-espert ma kienx maħsub biex jikkummenta iżda sempliċement biex jirrapporta. “Dak kien parti mill-brief,” wieġeb Cutajar, hekk kif intervjena l-Maġistrat Joe Mifsud li qed jippresiedi l-kumpilazzjoni, li ordna lix-xhud biex iżomm mal-fatti.
Bodycams mitfija meta suppost kienu mixgħulha
Il-Qorti semgħet ukoll li bodycams li intlibsu mill-akkużati kienu mitfija f’ċerti punti ewlenin. Seba’ sigħat ta’ filmati rreġistrati bejn il-5 u s-6 ta’ Settembru dehru li jindikaw sensiela ta’ avvenimenti. “Iżda meta dehret li kienet se tiġri xi azzjoni, il-bodycams ġew mitfija, jew waħda kienet mixgħula u l-oħra kienet mitfija,” qal ix-xhud.
“Dawk il-cameras kienu maħsuba biex ikunu mixgħula l-ħin kollu waqt ix-xogħol tal-pulizija,” irrimarka l-espert. Fl-istess jum tal-ħatra tiegħu, Cutajar qabad ukoll il-“ktieb tal-vjaġġ”, jiġifieri, dokument li jirreġistra movimenti tal-vettura tal-Pulizija li kienet tintuża l-aktar ta’ spiss fid-distrett tal-Ħamrun.
Deher li kien hemm nuqqas ta’ ‘loggings’ meta allegatament kienu involuti inċidenti bħal dawn. Kien hemm ukoll lakuni fis-sistema ta ‘traċċar tad-dejta, huwa qal. Mitlub mill-avukat Dean Hili biex jispjega tali lakuni, l-espert qal li l-karozza kellha xi difett tekniku li kien ġie mmarkat iżda kien għadu ma ġiex solvut.
Apparat elettroniku wkoll inqabad, iżda l-espert ma ngħatax il-passwords kollha tal-apparat. Huwa kien irnexxielu jiġbed ‘cloud chats’ u ‘voice messages; fost it-tliet ko-akkużati. L-analiżi tad-dejta kienet kompluta ħlief għal ċerti apparati li nstabu li kellhom ħsara.
Taħt l-awtorizzazzjoni tal-Maġistrat inkwirenti, Cutajar kien irnexxielu jirranġa l-apparat kollu ħlief wieħed, mudell ta’ iPhone li dwaru kien għamel ordni biex jixtri parts minn barra. Ix-xhud ippreżenta r-rapport tiegħu li ddokumenta l-oġġetti kollha, u għaqqad flimkien il-“jigsaw puzzle” b’aktar dejta minn fornituri tas-servizz.
Fi tmiem is-sessjoni tal-Erbgħa, il-Maġistrat Mifsud laqa’ talba biex jiġu varjati l-kundizzjonijiet tal-pleġġ. It-tliet ko-akkużati issa tħallew imorru l-Ħamrun, sakemm ma jmorrux l-għassa. Ix-xhieda ewlenin tal-prosekuzzjoni kienu xehdu u l-akkużati kollha s’issa rrispettaw il-kundizzjonijiet tal-pleġġ. Huma ngħataw ukoll estensjoni tal-‘curfew hours’, li tippermettilhom ikun d-dar fil-11:00pm minflok fit-8:00pm u fis-1:00am lejlet il-Milied u l-Ewwel tas-Sena.
