Is-semifinali kontra l-Kroazja żgur li se tibqa’ fil-memorja ta’ Lionel Messi hekk kif permezz tal-prestazzjonijiet tiegħu, irnexxielu jikser diversi rekords.
L-Arġentin irnexxielu jilħaq lil Lothar Matthȁus bħala l-aktar plejers li lagħbu waqt fażi finali tat-Tazza tad-Dinja b’total ta’ 25 logħba. Dan ir-rekord mistenni li jiksru kompletament fil-finali tal-Ħadd li ġej.
Il-penalty li bih l-Arġentina marret fil-vantaġġ kien il-11-il wieħed ta’ Messi fit-Tazza tad-Dinja. B’dan il-gowl hu qabeż lil Gabriel Batistuta bħala l-aqwa skorer tal-Arġentina ta’ kull żmien fit-Tazza tad-Dinja.
Il-kross li bih Julian Alvarez skorja t-tielet gowl fisser li Messi sar l-ewwel plejer minn meta bdew jinżammu r-rekords fl-1966 li rreġistra gowl u assist f’erba’ edizzjonijiet differenti tat-Tazza tad-Dinja.
Aktar minn hekk, Messi kien involut f’19-il gowl fit-Tazza tad-Dinja, b’total ta’ 11-il gowl u tmien assists. B’hekk hu laħaq ir-rekord ta’ Miroslav Klose, Ronaldo u Gerd Müller. Messi mistenni jilgħab fit-tieni finali tiegħu fit-Tazza tad-Dinja.
