Winston Urpani huwa r-rebbieħ tal-Malta Cruising Club Commodore’s Award għall-2022, li jingħata kull sena lil dak il-membru li jkun ta servizz speċjali lill-Klabb u lill-membri tiegħu
Winston Urpani huwa baħri entużjast li ilu membru tal-Klabb għal żmien twil u kien wieħed mill-ewwel membri li bdew ibaħħru lejn il-Greċja regolarment u b’mod partikolari l-Baħar Jonju.
L-entużjażmu u l-passjoni ta’ Winston lejn din id-destinazzjoni għamluh punt ta’ referenza għal membri oħra tal-Klabb għal parir u aktar minn darba kien strumentali biex jgħinhom fid-diffikultajiet tagħhom. Hekk kien il-każ dan is-sajf, meta membru f’daqqa waħda spiċċa bla ekwipaġġ biex imur bid-dgħajsa tal-qlugħ tiegħu lejn il-Greċja, u Urpani mill-ewwel offra biex jgħin b’mod volontarju.
Fil-programm ta’ attivitajiet tradizzjonali ‘off-season’ tal-Club, Winston Urpani saħansitra qasam l-avventuri ta’ cruising tiegħu lejn il-Greċja, fuq id-dgħajsa tal-qlugħ tiegħu Moon Duster, billi ta preżentazzjoni sħiħa dwar is-suġġett lil membri oħra tal-Klabb.
Il-Commodore’s Award Trophy ġie introdott mis-Segretarju tal-Klabb ta’ dak iż-żmien, Michael Mifsud, fl-2011. Minn dakinhar dan ir-rikonoxximent ingħata f’seba’ okkażjonijiet, jiġifieri lil David Dingli (2011), Austin Calleja (2013), Pierre Aquilina (2017), Patrick u Nadine Genovese (2018), John Cini (2019), Dr Carmel Abela (2020), u Dott. Ing. Luigi Tussellino (2021).
It-Trophy b’disinn tad-dgħajsa tal-qlugħ tar-ram, joriġina minn Marsilja Franza filwaqt li l-bażi, ta’ ġewż solidu, kienet manifatturata lokalment minn Stephen Azzopardi (SAW Ltd).
