Il-Ministru Clyde Caruana qed jibqa’ ma jirrikonoxix lill-Kamra tal-Ġeoloġi. U quddiem id-domandi ta’ Net News, baqa’ jinjora l-fatt li hu, għal xhur sħaħ evita li jiltaqa’ magħhom.
Waqt konferenza li fiha tħabbar l-aġġornament tal-mappa ġeoloika tal-gżejjer Maltin, il-Ministru kkonferma li ma tkellimx mal-Kamra tal-Ġeoloġi qabel ġiet ippubblikata l-mappa finali. Dan għaliex, skont hu messhom tkellmu qabel.
Peter Gatt, il-President tal-Kamra tal-Ġeoloġi, ikkonferma ma’ Net News li ma saret ebda konsultazzjoni mal-esperti Maltin u li ilhom jipprovaw jikkomunikaw mal-Ministru żmien twil, iżda qatt ma rċevew risposta.
Il-Ministru Caruana minn naħa tiegħu baqa jtenni, li fil-ġimgħatejn ċans li kienu miftuħin għall-konstultazzjoni l-Kamra tal-Ġeoloġi kellha titkellem hi mal-Gvern.
Net News jista’ jikkonferma li fid-9 ta’ Novembru ntbgħatet email kemm lill-Ministru u lill-Prim Ministru, ġranet qabel l-għeluq tas-sottomissjonijiet.
Peter Gatt qalilna li minħabba dan in-nuqqas ta’ rikonoxximent għall-għarfien tal-ġeoloġi lokali, saru ħafna żbalji fil-mappa tal-gżejjer Maltin. Tant hu hekk, li ġimgħatejn ċans għall-konsultazzjoni ma kienux biżejjed biex din l-istess Kamra tirranġa dawn l-imsemmija żbalji.
Il-President tal-Kamra kellimna wkoll dwar in-nuqqas ta’ liċenzji għat-tfitxija taż-żejt f’pajjiżna, u rrefera għal dan in-nuqqas bħala falliment li l-Ministru qed jinjora anke fi żmien ta’ kriżi globali. Dan għaliex il-liċenzji jaqgħu direttament taħt il-Ministru Clyde Caruana.
