Raġel ta’ 57 sena residenti Raħal Ġdid qed isofri minn xi ġrieħi wara sparatura waqt argument, li seħħet f’zona qrib iċ-ċimiterju tal-Addolorata. Net News hu infurmat li r-raġel ġarrab ġrieħi f’wiċċu wara li allegatament intlaqat minn ċomb li kien sparat minn arma tan-nar.
L-argument seħħ għall-ħabta tal-10:30 ta’ dalgħodu f’xi għelieqi fl-akwati ta’ Vjal Santa Luċija f’Raħal Ġdid.
Il-vittma ngħata l-assistenza min tim mediku u aktar tard ittieħed l-Isptar Mater Dei fejn ġie ċċertifikat li qed isofri minn ġrieħi gravi.
Ftit tal-minuti wara, raġel ta’ 30 sena u ieħor ta’ 66 sena, t-tnejn residenti Raħal Ġdid, ġew arrestati fuq il-post, b’involviment fil-każ. Għaldaqstant iż-żewġt irġiel qegħdin jiġu interrogati fid-Depot tal-Pulizija.
Bil-każ ġiet infurmata il-Maġistrat Caroline Farrugia Frendo li qegħda tmexxi l-inkjesta maġisterjali.
Iktar dettalji fil-ħin li ġej.
