‘Frodista’ ta’ dixxendenza Maltija hi mara ħielsa minkejja li ammettiet fil-Qorti li qarrqet b’diversi nies. Dan wara li Mħallef fl-Awstralja ddetermina li t-terminu oriġinali tagħha ta’ priġunerija għall-100 reat tagħha kien ‘kemmxejn aħrax’, u li l-mara għandha diversi problemi mentali li għandhom jiġu indirizzati.
Samantha Azzopardi ta’ 33 sena, mara Awstraljana li l-familja tagħha hi Maltija, kienet wieġbet ħatja f’Qorti ta’ Sydney għal akkużi ta’ frodi wara li kienet ukoll ippreżentat lilha nfisha bħala tifla tal-iskola. Azzopardi, deskritta fil-midja Awstraljana bħala serial con artist hi magħrufa li użat aktar minn 40 identità falza, ingannat lill-awtoritajiet fl-Irlanda u l-Kanada, fl-2013 u l-2014 biex ikkonvinċithom li kienet vittma ta’ abbuż sesswali tat-tfal miżmuma minn traffikanti tal-bnedmin.
Hi kienet tuża ħafna ismijiet fittizji, fosthom bħala tifla skolastika ta’ 13-il sena taħt l-isem Harper Hart biex tġi ‘fostered’. Hi kienet appellat is-sentenza ta’ 17-il xahar ħabs imposta fuqha f’Novembru li għadda. Kienet ġiet akkużata wkoll li ffrodat lid-Dipartiment tal-Familji u s-Servizzi fil-Komunità permezz tal-finanzjament ta’ medikazzjoni.
Hija kienet intbagħat il-ħabs wara li wieġbet ħatja li xjentement għamlet rappreżentazzjoni falza lill-Pulizija li kienet vittma ta’ negliġenza tat-tfal. Il-mara ta’ 33 sena kienet qed tagħmilha bħala ċittadina Franċiża ta’ 14-il sena bil-Pulizija jinvestigaw dawn ir-reati madwar Sydney, li kienet tinvolvi diversi awtoritajiet, fosthom il-Pulizija Federali Awstraljana u l-Pulizija Franċiża.
L-awtoritajiet kienu anke ssuspettaw li hi kienet vittma ta’ ċirku ta’ servitù sesswali qabel ma kixfu l-verità. Il-Qorti semgħet kif Azzopardi mexxiet gidba elaborata waqt li kienet fuq ordni twila ta’ korrezzjoni fil-komunità talli ddikjarat b’mod falz li kienet vittma ta’ membru tal-kult li żammha ostaġġ, stupraha, u injettaha bil-forza droga għall-fertilità.
L-avukat tagħha Stewart O’Connell sostna li s-sentenza tagħha ta’ 17-il xahar ħabs kienet “manifestament eċċessiva” minħabba s-sitwazzjoni kumplessa tas-saħħa mentali ta’ Azzopardi. “Qatt ma kellha tkun arrestata fl-ewwel lok,” qal.”Azzopardi fil-preżent mhix kapaċi tikkontrolla dan l-impuls (li tagħmel rapporti foloz) u huwa ċar fir-rapporti mediċi li dan mhux se jinbidel qabel ma tkun irċeviet assistenza psikoloġika intensa u kontinwa.”
O’Connell qal li l-Maġistrat li ta s-sentenza kellu jagħti aktar piż lir-rapporti psikoloġiċi mressqa lill-Qorti li juru li Azzopardi “hija persuna li tassew m’għandha l-ebda kontroll fuq l-imġieba tagħha”. Għalkemm qabel li xi wħud mill-offiżi kienu “elaborati”, huwa qal li l-klijenta tiegħu deheret li ma kinetx konxja tal-azzjonijiet tagħha.
L-avukat tagħha qal lill-Qorti li diversi rapporti psikoloġiċi ssuġġerew li Azzopardi għamlet rapporti foloz bħala mod kif tiżvoga ma’ tfulija trawmatika tagħha. “Fl-ebda wieħed minn dawn ir-reati ma huwa ċar li hi kienet biex tikseb xi ħaġa, apparti forsi minn xi kura,” huwa qal .
“Jidher li qed tipprova tikseb il-kura li tħoss li qatt ma rċeviet bħala tifla, billi tagħmel dawn ir-rakkonti fittizji. Ħadd m’għandu jmur il-ħabs għal dan.” Il-Qorti semgħet li hi kienet ġiet iddijanjostikata b’disturb ‘borderline’ tal-personalità u disturb depressiv persistenti b’ansjetà, b’dijanjosi addizzjonali suġġeriti minn esperti mediċi differenti.
Il-prosekutur saħaq li d-diversi dijanjosi enfasizzaw id-diffikultà biex tiġi estratta l-verità minn Azzopardi. Il-Qorti semgħet ukoll li Azzopardi qabel ġiet djanjostikat b’kundizzjoni msejħa ‘pseudologia fantastica’, li timmanifesta ruħha bħala gideb kompulsiv u patoloġiku.
L-Imħallef John North qabel li l-mara “ma jidhirx li għandha xi motivi reali” bħal regħba jew vendetta biex tmexxi l-offiżi persistenti tagħha. “Il-file jagħmel qari pjuttost depressiv għaliex huwa ċar li din iż-żagħżugħa teħtieġ superviżjoni kostanti u għajnuna biex twaqqafha milli terġa ’tispiċċa quddiem l-awtoritajiet,” huwa qal.
L-Imħallef innota r-rekord kriminali estensiv ta’ Azzopardi, li jkopri diversi stati fl-Awstralja u jinkludi reati internazzjonali. Dokumenti tal-Qorti jiżvelaw li l-aħħar kundanna mmarkat il-100 reat domestiku ta’ Azzopardi. L-Imħallef North iddetermina li s-sentenza inizjali kienet “kemmxejn ħarxa” u ddeċieda li tnaqqas il-piena tal-kondotta bi tliet xhur. meta
Azzopardi ġiet eliġibbli għall-ħelsien mill-arrest fil-15 ta’ Diċembru li għadda. Hi spiċċat l-ewwel darba fl-aħabarijiet internazzjonali fl-2013 meta nstabet iddur fit-toroq ta’ Dublin, l-Irlanda. Hi kienet wasslet lill-Pulizija Irlandiża biex temmen li kienet vittma ta’ ċirku ta’ traffikar tal-bnedmin, li wasslet għal investigazzjoni mifruxa tal-pulizija li swiet mijiet ta’ eluf ta’ ewro.
Ftit snin wara, ġiet arrestata wara li qalet lill-Pulizija fil-Kanada li kienet vittma ta’ sfruttament sesswali u traffikar. Hi ġiet akkużata u deportata miż-żewġ pajjiżi wara li t-talbiet tagħha ġew ippruvati li kienu foloz. L-Imħallef North qal li jittama li Azzopardi tieħu l-opportunità biex ittejjeb is-saħħa mentali tagħha.“Jekk jogħġbok ipprova ħu t-trattament li tant ovvjament għandek bżonn,” qalilha l-ġudikant.
