Sena ġdida, li għadha dominata mill-gwerra fil-Lvant tal-Ewropa.
Huwa dwar dan illi tkellem il-Kap tal-Partit Nazzjonalista, Bernard Grech, hekk kif laqqa’ lill-Korpi Diplomatiċi fid-Dar Ċentrali tal-Partit Nazzjonalista għall-awgurju tal-bidu tas-sena l-ġdida.
Bil-Kap tal-PN jikkundanna bla riżervi l-attakki tar-Russja fuq l-Ukreni.
Fid-diskors tiegħu hu tenna li l-gwerra kellha impatt globali, speċjalment fuq is-sigurtà tal-provisti tal-ikel ta’ pajjiżi vulnerabbli. Hu stqarr li l-Oppożizzjoni se tkun qed tibqa’ tgħin lil Gvern Malti fl-assistenza tiegħu lill-Ukrajna, kif ukoll b’mod speċifiku fl-applikazzjoni tal-Ukrajna sabiex ssir parti mill-UE.
Il-Kap tal-Partit Nazzjonalista għamel referenza għall-President tal-Parlament Ewropew, Roberta Metsola….hekk kif tenna li hi qed timplimenta l-mandat tagħha bl-aktar mod professjonali. U fakkar li kienet l-ewwel mexxej fl-Ewropa li żaret l-Ukrajna wara li faqqat il-gwerra fi Frar li għadda.
Bernard Grech qal li t-tmexxija ta’ Metsola, bla dubju se tkun qed isaħħaħ ir-reputazzjoni tal-UE internazzjonalment.
Bernard Grech, sostna ukoll li d-drittijiet umani għandhom ikunu fiċ-ċentru tal-politika mhux biss dik nazzjonali iżda ukoll internazzjonali. Dan filwaqt li tkellem ukoll dwar it-tibdil fil-klima li hi theddida fuq livell globali.
Il-Kap tal-Partit Nazzjonalista temm id-diskors tiegħu billi emfasizza l-importanza tax-xogħol diplomatiku li jsir mill-Korpi Diplomatiċi, kif ukoll awguralhom il-kumplament tal-ħidma t-tajba għas-sena l-ġdida.
Preżenti kien hemm, l-Viċi Kap tal-PN, Alex Perici Calascione, is-Segretarju Ġenerali, Michael Piccinino, is-Segretarju Internazzjonali, Veronica Perici Calascione, l-Kelliem għall-Affarijiet Barranin u Ewropej u l-Kummerċ, Beppe Fenech Adami u l-President tal-Kunsill Amministrattiv Graham Bencini.
