L-akbar sfidi li se tkun qed taffaċja d-dinja din is-sena se jkunu l-għoli tal-ħajja, in-nuqqas fil-provista tal-enerġija, il-bidla fil-klima u l-immigrazzjoni.
Hekk tenna l-President ta’ Malta George Vella, fil-laqgħa mal-Korpi Diplomatiċi fl-okkażjoni tal-awgurju tas-sena l-ġdida, fil-Palazz tal-Granmastru fil-Belt Valletta.
Fid-diskors tiegħu, il-President semma’ kif id-dinja qed taffaċja theddida għal-paċi u l-istabbiltà globali minħabba l-gwerra fl-Ukrajna.
Hu wera id-diżappunt għal-fatt li n-nazzjonijiet mhux jaqblu fuq il-kaġun u l-konsegwenzi ta’ din il-gwerra, u huwa għalhekk li għandna mmexxu messaġġ wieħed u unanimu; dak ta’ ordni internazzjonali u rispett globali. Bil-President Vella jfakkar li dawn huma l-istess valuri li pajjiżna ilu jħaddan, minn wara l-Indipendenza fl-1964.
Il-President kompla jgħid kif Malta ukoll qed taffaċja sfidi fl-enerġija, u xorta tinsab maħkuma minn instabbiltà. U huwa għalhekk li l-Unjoni Ewropeja għandha rwol importanti – dak li tati direzzjoni.
Hu għalaq id-diskors tiegħu billi tenna li Malta se tkun qed timxi fuq tliet pilastri, dawk ta’ sigurtà, sostenn u solidarjetà.
Il-Korpi Diplomatiċi ltaqgħu ukoll mal-Prim Ministru Robert Abela f’Kastilja hekk kif hu wkoll tkellem fuq l-impatt tal-gwerra fuq id-dinja, u kif it-tibdil tal-klima se tkun fiċ-ċentru tad-diskussjoni.
