L-ewwel kumpanija bis-sistema ta’ ridesharing f’pajjiżna, il-kumpanija Cool, se tkun qed twaqqaf l-operat tagħha f’Malta, mis-27 ta’ Jannar li ġej.
Kif stqarr id-Direttur Eżekuttiv tal-kumpanija Debono Group – Michael Debono – is-servizz offra mezz ta’ trasport alternattiv, bi ħlas affordabbli, bl-iskop li joħloq alternattiva iżjed sostenibbli. Dan għaliex tnaqqsu l-karozzi misjuqa minn persuna waħda, filwaqt li tnaqqset il-problema ta’ konġestjoni f’certu hinijiet.
Dan apparti li naqsu l-emissjonijiet b’persentaġġ konsiderevoli. U huwa għalhekk li skont statistika miġbura, Cool, kellha l-akbar impatt pożittiv fuq it-traffiku matul l-aktar sigħat intensivi ta’ konġestjoni.
Il-kumpanija Cool, qalet illi filwaqt li s-servizz tagħha kien ta’ impatt pożittiv, dan mhux soluzzjoni għall-problema ta’ traffiku li għandna f’pajjiżna – iżda għandu jkun hemm bidla fit-trasport – b’soluzzjonijiet li jnaqqsu t-traffiku.
Cool stqarret li se tkun qed tagħti rifużjoni ta’ ħlas lill-klijenti li qed jagħmlu użu mill-pass tagħha sal-Ġimgħa 27 ta’ Jannar, filwaqt li taċċerta li x-xufiera se jkunu qed jitħallsu dak li hu dovut lilhom.
Din il-kumpanija hija t-tielet kumpnaija li waqfet topera f’pajjiżna, hekk kif fl-aħħar tas-sena tal-2022, NextBike Malta u GoTo ukoll temmew is-servizzi tagħhom – li jfisser daqqa fuq is-sistemi alternattiv ta’ trasport.
