Tikber il-kritika fuq il-Ġermanja wara li l-Gvern żamm lura milli jipprovdi tankijiet tal-gwerra tal-għamla Leopard 2 sabiex l-Ukrajna issaħħaħ il-pożizzjoni tagħha f’din il-gwerra.
Il-Ministru tad-Difiża Ġermanja Boris Pistorius stqarr li hemm opinjonijiet varji fuq jekk għandhomx jiġu provduti dawn it-tankijiet. Hu ċaħad li qed jistenna permess mill-Kanċillier Ġermaniż sabiex jintbgħatu dawn it-tankijiet.
Il-President Ukren, Volodymyr Zelensky faħħar l-għajnuna mogħtija mill-membri tan-NATO, filwaqt li stqarr li hemm bżonn ta’ tankijiet moderni. Dan għaliex bħalissa, it-tankijiet li qed jintużaw huma mudelli antiki – li mhux b’saħħithom biżejjed biex jirribattu lit-truppi Russi.
Il-Ministru Pistorius spjega kif il-Gvern f’Berlin kien lest imexxi fuq din id-deċiżjoni li kieku kien hemm qbil bejn l-alleati, filwaqt li ma indikax meta se tkun qed tittieħed deċiżjoni.
Lejn l-aħħar tas-sena li għaddiet, il-Kap tan-NATO, Jens Stoltenberg, spjega li il-Ġermanja qed iżomm lura sakemm l-Istati Uniti tibgħat it-tankijiet taghha. Ghalkemm l-Amerika qed tghid li dawn mhux prattiċi għall-Ukrajna.
Fost il-pajjiżi li bħalissa qed joffru għajnuna lill-Ukrajna hemm id-Danimarka, l-Ingilterra, l-Estonia, il-Latvija, il-Polonja u r-Republika Ċeka.
