Minkejja li lagħbu għal taqsima sħiħa bi player anqas wara li tkeċċa Kevin Tulimieri, Birkirkara dawru telfa f’rebħa kontra Floriana biex kisbu tlett punti importanti li bihom komplew il-ġlieda tagħhom għal post fl-Ewropa. Kienet logħba kumbattuta u missielta fejn f’xi mumenti wkoll saret aggressiva. Għal Birkirkara din kienet ir-raba’ rebħa mill-aħħar ħames logħbiet fejn jidher li t-tim issa qed jiffunzjona sew. Għalihom iddebutta l-ex player ta’ Ħamrun Spartans Matteo Fedele. Mill-banda l-oħra jkompli l-mument diffċli ta’ Floriana fejn wara l-eliminazzjoni tagħhom mill-Iżibet FA Trophy tilfu wkoll dan il-konfront kontra Birkirkara dan meta kienu gowl minn fuq u b’superjorita numerika. Il-bidu kien kollu tal-Greens iżda aktar ma’ beda jgħaddi ħin l-Istripes daħlu aktar fil-logħba. Iżda meta l-logħba dehret li ser tintemm fi draw wasal il-gowl tas-sostitut Da Paixao biex it-tlett punti marru għand Birkirkara.
Ikomplu jżommu l-kmand tal-klassifika b’distakk ta’ ħdax-il punt Ħamrun Spartans, dan wara li fi tmiem il-ġimgħa huma għelbu lill-ġirien Pietà bl-iskor ta’ 2-1. Kien rebħa mhux faċli għal-Ispartans fejn nazzarda ngħid li kieku l-Hotspurs ħadu punt ma’ kienu jisirqu xejn. Iż-żewġ timijiet kienu ġejjin minn rebħiet u kwalifikazzjoni fl-Izibet FA Trophy, inċidentalment kontra oppożizzjoni Għawdxija. Ħamrun kontra Għajnsielem wara l-ħin barrani u Pieta kontra Xewkija. Ħamrun bdew tajjeb din il-partita fejn bdew jippruvaw jiftħu lid-difiża avversarja. Iżda Pieta żammew sod fejn il-gowlkeeper Cini kien għal darb’oħra attent bejn il-lasti tagħhom. B’hekk Pietà baqgħu ankrati f’qiegħ il-klassifika tal-Kampjonat Premier iżda jaspiraw li bil-progress li wrew fl-aħħar logħbiet jinqalgħu minn hemm. Għal Ħamrun rebħa ta’ rutin fejn issa jmisshom kontra Sirens u jħarsu ‘l quddiem b’ottimiżmu għar-rebħ tad-disa’ kampjonat fl-istorja.
Gżira United ġabu fix-xejn lil Marsaxlokk b’wirja eċċellenti fit-tieni taqsima tal-partita. B’din ir-rebħa l-Maroons baqgħu jżommu t-tieni post tal-klassifika. Fil-fatt kienu x-Xlukkajri l-aktar li kellhom mil-logħob matul l-ewwel taqsima iżda Gżira kellhom ħsibijiet oħra fejn wara li skurjaw żewġ gowls fl-ewwel ħames minuti tat-tieni taqsima qatt ma’ ħarsu lura. Għal Gżira din kienet id-disa’ rebħa tal-istaġun fejn il-prospetti minn naħa tagħhom jidhru li huma tajbin sabiex jilħqu l-objettiv tagħhom. Mill-banda l-oħra Marsaxlokk baqgħu jokkupaw il-ħdax-il post fil-klassifika fejn iridu jkunu kawti peress li bil-forma ta’ Santa Lucia kapaċi li jispiċċaw jidħlu f’taqtiegħa kontra r-relegation.
Hibernians ukoll komplew jippressaw fin-naħa ta’ fuq dan wara li huma għelbu lil Mosta bl-iskor ta’ 2-0. Din ir-rebħa ma’ kienetx xi waħda faċli għall-Pawlisti fejn huma riedu li jirritornaw għar-rebħ wara t-telfa kontra Ħamrun Spartans. Rebħa li għalihom kienet l-ewwel waħda għal din is-sena. Kellu jkun Jurgen Degabriele li b’gowl f’kull taqsima ta r-rebħa lil Hibernians. Mosta kien mistenni ħafna aktar minnhom f’konfront dirett li kieku rebħuh kien ifisser ħafna. Għalihom iddebutta l-attakkant mill-Kongo Dore filwaqt li Hibernians wettqu xejn anqas minn tlett bidliet mit-telfa kontra l-Ispartans. Dawn tal-aħħar issa jmisshom test iebes kontra Gżira, tim li bħalhom qed jissielet għal post fl-Ewropa. Il-kompitu ta’ Mosta jista jkun ftit aktar faċli peress li jiltaqgħu kontra t-tim tal-qiegħ Pieta Hotspurs.
Balzan komplew bil-mixja pożittiva tagħhom dan wara li huma għelbu lil Gudja United b’gowl uniku skurjat fl-ewwel taqsima minn Mattheus de Sousa Nogureira. Fil-fatt kienet rebħa meritata għat-tim immexxi minn Oliver Spiteri fejn dawn qed jittamaw li jidħlu mat-tlett timijiet ta’ qabilhom sabiex jisfidaw għall-Ewropa wkoll. Gudja naqsu ħafna milli jkunu kreattivi u kienu ftit ħafna ċ-ċansijiet li ħolqu matul id-disgħin minuta. Kemm fid-difiża naqsu li jkunu organizzati bħas-soltu filwaqt li fl-attakk bdew isibuha diffiċli biex jinfdu lill-avversarji. Għal Balzan din kienet it-tieni rebħa konsekuttiva li biha komplew jikkonfermaw il-potenzjal tat-tim li beda jilgħab logħob meqjus u bis-sens.
Santa Lucia kellhom kemm bidu kif ukoll tmiem tal-ħolma fil-logħba tagħhom kontra Żebbuġ Rangers li rebħu bl-iskor ta’ 2-1. Wara biss ftit sekondi huma marru fil-vantaġġ biex ir-Rangers kisbu d-draw fit-tieni taqsima. Kollox kien qed jindika li l-logħba ser tintemm fi draw u b’hekk kollox jibqa l-istess fin-naħa t’isfel tal-klassifika. Iżda s-sostitut Jamie Carbone skorja fil-ħin miżjud biex kiseb rebħa drammatika għat-tim tiegħu. Dan kien it-tieni riżultat pożittiv b’mod konsekuttiv wara li l-ġimgħa li għaddiet is-Saints kisbu rebħa xejn mistennija dan wara li huma eliminaw lil Floriana mill-fażi tal-aħħar tnejn u tletin tal-FA Trophy. B’din ir-rebħa Santa Lucia qabżu lill-istess Żebbuġ fejn issa jinsabu fit-tnax-il post tal-klassifika. Ir-Rangers iridu jibdew jemmnu aktar biex jakkwistaw il-punti li wara kollox huma dawk li jiswew.
INNUTAJNA
LI Rodnick Abdilla rreżenja minn President ta’ St. George’s FC. Jidher li r-raġuni wara din ir-riżenja hija l-protest ta’ Msida SJ fejn il-klabb Bormliż tilef il-punt li kien inkiseb fil-pitch minħabba l-ineliġibilta ta’ player. Dan l-inċident effettwa xi ftit lil St George’s fejn anki fi tmiem il-ġimgħa tilfu kontra Kirkop United bl-iskor ta’ 4-1.
LI matul tmiem din il-ġimgħa r-referees flimkien mal-assistenti ħadu sehem fil-Var introductory course. Id-direttur tekniku tal-IFAB David Elleray mexxa dan il-kors li ser jgħin lir-referees fuq il-panel tal-FIFA f’aktar għarfien dwar il-VAR.
LI l-attakkant veteran Timothy Thomas irnexxielu jiskorja l-150 gowl tiegħu bil-flokk ta’ Senglea Athletic. Thomas, li hu mill-Isla, għandu 37 sena, u skorja wieħed mill-gowls fir-rebħa ta’ 3-0 li Senglea Athletic kellhom kontra Pembroke.
