Ħadd ma weġġa, hekk kif ilbieraħ waranofsinhar tqaċċtet blata mdaqqsa minn mal-irdum fil-Mellieħa, u spiċċat fuq struttura tal-Popeye Village, f’Anchor Bay.
L-operaturi tal-Popeye Village, fi stqarrija fuq il-medja soċjali – spjegaw li waqgħet blata fuq waħda mill-istrutturi tal-villaġġ. Huma tennew, li fil-ħin tal-inċident il-villaġġ kien jinsab magħluq minħabba l-maltemp li ħakem lill-pajjiżna.
Huma spjegaw ukoll li il-protezzjoni ċivili kienu infurmati b’dan il-każ b’mod immedjat u li sar rapport lill-pulizija. L-operaturi għalqu l-istqarrija billi infurmaw lill-pubbliku li l-villaġġ se jkun qed jibqa’ magħluq sakemm isiru t-tiswijiet meħtieġa.
Filwaqt li l-ġurnata bdiet bl-awtoritajiet inaddfu u jeliminaw oġġetti ta’ periklu mit-toroq Maltin, xorta waħda hu mistenni li l-gżejjer Maltin jibqgħu jinħakmu minn riħ qawwi – hekk kif il-maltempata Helios miexja lejn il-Libya.
