Diversi postijiet ta’ wirt storiku jesperjenzaw ħsarat kawża tal-maltempata Helios

Numru ta’ lokalitajiet Maltin ġarrbu ħsarat, wara li nħakmu mill-maltempata Helios – karaterizzata minn riħ qawwi u ammont sostanzjali ta’ xita.

Fosthom f’Għajn Tuffieħa, wieħed mit-torrijiet ta’ Lascaris tas-seklu 17 – mibni 386 sena ilu, iċċedi parzjalment kaġun tar-riħ qawwi li ħakem l-inħawi. Iż-żona tinsab magħluqa għall-pubbliku filwaqt li l-ħsara li saret lit-torri għada trid tiġi determinata.

Bosta qed jistqarru li xi ħsarat illi ġarrbu dawn il-binjiet storiċi setgħu ġew evitati. Tant hu hekk, l-Assoċjazzjoni Wirt il-Kalkara, tinsab diżappuntata li l-karbiet li għamlet lill-awtoritajiet dwar il-perikli imminenti, waqgħu fuq widnejn torox. Hekk kif ċediet parti mill-peniżola ta’ Bighi, fejn fuqha jistrieħ dak li kien l-isptar navali fil-Kalklara.

L-assoċjazzjoni tistqarr li din iż-żona, fil-bajja tar-Rinella, ġiet rimarkata bħala waħda mhux stabbli bosta drabi, saħansitra anke kella ssir estensjoni tal-mall madwar il-kosta, iżda dan qatt ma sar. Qed jintalab li din iż-żona tiġi evitata kemm mill-art u l-baħar.

Ilbieraħ, fil-viċinanzi waqa’ ukoll parti mill-ħajt li jdawwar Villa Protelli – villa storika li kienet isservi bħala villa tal-Ammirall. L-assoċjazjoni tistqarr li ilha erba’ snin tikkuntattja l-Ministeru sabiex tiġi salvata din il-binja. Din ukoll waqgħet fuq widnejn torox. Din l-istess assoċjazjoni, tispjega ukoll li talbu biex jiltaqgħu mal-Ministeri konċernati bosta drabi, iżda ġew injorati u ukoll miċħuda.

L-assoċjazjoni tappella lill-awtoritajiet sabiex jisimgħu t-talba tagħhom, għall-ġid il-wirt storiku u s-saħħa tal-pubbliku.

Għawdex ukoll intlaqtet sew mill-maltemp kiefer, hekk kif iġġarraf ħajt li jmiss mad-daħla tal-foss taċ-Ċitadella, filwaqt li waqgħu xi ħitan tas-sejjieħ fil-madwar.

F’Novembru r-restawr taċ-Ċitadella ingħatat il-premju Regiostars wara li ntgħażel bħala r-rebbieħ minn 15-il proġett ieħor minn pajjiżi Ewropej.

Id-direttorat tal-Kultura fi ħdan il-Ministeru għal Għawdex avża li fil-jiem li ġejjin dan il-foss se jkun magħluq għall-pubbliku.

Fl-istess maltempata, it-terminal tal-fast ferry ta’ Għawdex fil-Belt Valletta ġarrab ħsara sostanzjali. Hekk kif jidher li mhux biss mgħerreq bl-ilma, iżda anke zvujtat minn oġġetti li kien hemm fih, inkluż siġġijiet u bankijiet fejn kienu jħallsu u jistennew l-passiġġiera. Dan it-terminal ġie inawgurat madwar sena u nofs ilu.

Inċident iehor, din id-darba fil-Mellieħa hekk kif ilbieraħ waranofsinhar tqaċċtet blata mdaqqsa minn mal-irdum fil-Mellieħa, u spiċċat fuq stuttura tal-Popeye Village, f’Anchor Bay.

L-operaturi tal-Popeye Village, fi stqarrija fuq il-medja soċjali – spjegaw li waqgħet blata fuq waħda mill-istrutturi tal-villaġġ u tennew li fil-ħin tal-inċident il-villaġġ kien jinsab magħluq minħabba l-maltemp li ħakem lill-pajjiżna.

Huma spjegaw ukoll li il-protezzjoni ċivili kienu infurmati b’dan il-każ b’mod immedjat u li sar rapport lill-pulizija. L-operaturi għalqu l-istqarrija billi infurmaw lill-pubbliku li l-villaġġ se jkun qed jibqa’ magħluq sakemm isiru t-tiswijiet meħtieġa. Fortunatament ħadd ma weġġa f’dan l-inċident.

Filwaqt li l-ġurnata bdiet bil-ħaddiema tad-Diviżjoni tat-Tindif u Manutenzjoni inaddfu l-ħsarat li ħalla l-maltemp – hu mistenni li l-gżejjer Maltin jibqgħu jinħakmu minn riħ qawwi matul l-ġurnata u l-lejl li ġejjin, hekk kif l-maltempata Helios riesqa bdiet miexja lejn il-Libya.