Wara li kien ikkundannat mill-Kamra tal-Avukati, l-aġir tal-Prim Ministru Robert Abela, u l-kuntatt li għamel ma’ Maġistrat, issa ġie kundannat ukoll mill-editorjal tal-gazzetta Times of Malta. Dan wara li ftit tal-ġimgħat ilu, waqt diskors politiku f’Birkirkara, hu ammetta li kellu taħdita ma’ membru tal-ġudikatura.
Bl-editorjal jinsisti li din mhi xejn għajr “influwenza li mhix xierqa”.
L-editur jgħid illi “bħala avukat, u iżjed u iżjed bħala Priministru, Abela suppost jaf aħjar”. U spjega li fl-imġieba tagħhom, l-Ministri kollha għandhom juru rispett lejn l-istituzzjonijiet u l-liġijiet ta’ pajjiżna – iżda permezz tal-azzjoni irresponsabbli tiegħu, Abela ma uriex dan ir-rispett.
Aktar u aktar għaliex il-Prim Ministru ammetta li tkellem ma’ maġistrat waqt attività politika Laburista, u din l-azzjoni turi ċertu irresponsabbiltà fil-ħidma tiegħu.
Id-diskursta bejn Abela, u l-maġistrat, li s’issa għadu mhux magħruf – toħloq instabbiltà fl-istituzzjoni ġudizjarja, hekk kif il-familjarità toħloq nuqqas ta’ fiduċja fl-istituzzjonijiet tagħna. Dan għaliex membri tal-ġudikatura mhux permessi jkollhom kuntatti mal-membri tal-partiti politċi.
Diskussjonijiet bejn membri tal-ġudikatura u membri tal-parlament jistgħu iseħħu biss permezz ta’ rappreżentazzjoni formali. U huwa ċar li d-diskussjoni ta’ Abela mal-ġudikant, ma seħħietx b’dan il-mod – għalhekk, dan kien ksur fil-kodiċi tal-etika, kemm minn Robert Abela u anke mill-maġistrat involut.
L-editorjal tat-Times, stqarr li l-ministru tal-ġustizzja, Jonathan Attard m’għandux ikaxkar iżjed saqajh f’din is-sitwazzjoni, iżda għandu jitkellem fil-parlament u jispjega x’azzjoni se tittieħed mill-Kummissjoni għall-aministrazzjoni tal-Ġustizzja, u anke mil-Prim Imħallef.
L-editur tenna li pajjiżna kellu biżejjed skandli abbinati ma’ maġistrati, u li diġa hawn nuqqas ta’ fiduċja fil-qrati Maltin. U issa, minħabba li dan il-maġistrat mhux magħruf, il-maġistrati kollha qegħdin taħt skrutinju.
Għalhekk, jgħid l-editur tat-Times, dan il-każ m’għandux jintesa.
