Il-Pulizija Metropolitana qalet li fis-sigħat bikrin tas-Sibt, miet żagħżugħ ta’ 26 sena filwaqt li raġel ieħor ta’ 24 sena jinsab l-isptar, wara li qalgħu daqqiet ta’ sikkina f’Hackney Wick, fil-Lvant ta’ Londra.
Fuq dan il-każ għadhom ma saru l-ebda arresti.
F’inċident separat, raġel ta’ 50 sena nqatel f’Lambeth, fil-Lbiċ ta’ Londra.
Kien għall-ħabta tas-1:30am tas-Sibt meta daħlu rapporti li kien hemm raġel ferut b’mod kritiku fi flat f’Hicken Street. Assistenza medika waslet fuq il-post u ħadet lir-raġel l-isptar fejn miet ftit tal-ħin wara.
Raġel, li għandu wkoll 50 sena, ġie arrestat fuq suspett ta’ qtil. Huwa ttieħed fl-għassa tal-pulizija fin-Nofsinhar ta’ Londra u għadu arrestat.
Ma jidhirx li l-attakki fil-Lvant u l-Lbiċ ta’ Londra huma relatati.
