Colin Schembri
Starlites FIJO………….75
Mellieħa Libertas…….70
(17-21)(23-11)(22-27)(13-11)
Starlites rebħu wkoll l-MBA Shield wara r-rebħ tas-Super Cup fl-ewwel partita tal-istaġun meta għelbu lil Mellieħa Libertas 75-70 fi tmiem ta’ finali stupenda. Finali li ntlagħbet quddiem attendenza mill-isbaħ bil-partitarji ta’ Mellieħa saħansitra ġabu wkoll banda għall-okkażjoni. Ir-regola tas-shield li l-partita tintrebaħ mall-75 punt ħalliet lil kulħadd fuq ix-xwiek speċjalment fl-aħħar ħinijiet. Starlites kienu mingħajr Matthew Scerri fil-waqt li għal Mellieħa għadu nieqes l-Amerikan Connor Zinaich. Wara li Starlites għamlu l-ewwel basket tal-partita minn Darius George, Mellieħa wieġbu b’run ta’ 12-3 bi trippli ta’ Robert Bonnici u Vukassin Jandric flimkien ma’ Sebastien Valencia. Starlites irkupraw u kienu huma li għaddew għal break ta’ 10-2 bil-punti ta’ George, Alec Felice Pace u Kurt Xuereb biex marru punt minn fuq 17-16. Mellieħa għalqu t-taqsima minn fuq wara basket ta’ Isaac Bonett u trippla ta’ David Bugeja għal skor ta’ 21-17. Fit-tieni sessjoni, Mellieħa kabbru l-vantaġġ wara aktar trippli din id-darba minn Sebastien Valencia u Bonett. Mellieħa fetħu vantaġġ ta’ seba’ punti però r-risposta ta’ Starlites malajr waslet hekk kif huma għamlu run qawwija ta’ 17-1 b’diversi punti mill-Amerikani Zekiah Owens u George biex daħlu jistrieħu 8 minn fuq 40-32.
Wara l-intervall, Mellieħa resqu viċin wara żewġ trippli ta’ Jandric. Starlites wieġbu bi break ta’ 9-2 fosthomtrippla ta’ Xuereb biex fetħu vantaġġ massimu ta’ 11 -il punt 51-40. Wara trippla fuq kull naħa minn Bonett u Felice Pace, Mellieħa kellhom mument tajjeb bi break ta’ 9-2 biex waslu sa’ 4 punti ‘l bogħod 52-56. Starlites kellhom trippla miż-żagħżugħ Miguel Fabri qabel ma Mellieħa għamlu seba’ punti oħra mingħajr risposta biex marru minn fuq iżda trippla oħra ta’ Fabri eżatt mal-horn finali poġġiet lil Starlites minn fuq 62-59 fost il-briju tal-partitarji tagħhom. L-aħħar sessjoni kienet missielta u punti ta’ Jandric u Bugeja reġgħu taw vantaġġ lil Mellieħa. George għamel ħames punti mingħajr risposta biex b’żewġ minuti u 56 sekonda għat-tmiem Starlites kienu basket minn fuq 72-70. Bugeja falla l-lay-up fl-attakk sussegwenti u mir-rebound ta’ George il-ballun wasal għand MatthewAttard li mill-assist ta’ Jacob Bates għamel it-trippla deċisiva li rat lil Starlites jerbħu l-partita 75-70 u t-tazza. Il-President tal-MBA Paul Sultana ppreżenta t-tazza lil captain ta’ Starlites Alec Felice Pace hekk kif huma iċċellebraw ir-rebħ tat-tieni unur tal-istaġun.
Starlites FIJO: A. Felice Pace 16, Z. Owens 10, M. Attard 3, J. Bates 8, I. Felice Pace 1, M. Fabri 6, R. Carabott, L. Farrugia, K. Xuereb 7, N. Sultana, D.George 24.
Mellieħa Libertas: S. Zammit, M. Falzon, D. Bugeja 14, R. Bonnici 4, V. Jandric 16, I. Bonett 10, N. Bukva 1, N. Jovanovic, M. Formosa, O. Said, S. Valencia 25.
Referees: Daniella Torok, Gordon Barbara, Zvezdan Dobrosaviljevic
