Colin Schembri
Caffè Moak Luxol……40
Starlites FIJO…………55
(9-16)(15-14)(13-19)(3-6)
Starlites FIJO rebħu l-ewwel unur tagħhom għal dan l-istaġun hekk kif fil-finali tal-MBA Shield għelbu lil Caffè Moak Luxol 55-40 hekk kif il-partita ntemmet fil-bidu tal-aħħar sessjoni wara żewġ trippli minn Steffi De Martino u Mikela Riolo. Dawn iż-żewġ players mhux biss għamlu l-punti deċisivi iżda kienu wkoll tnejn mill-aqwa players fuq il-court. De Martino protaginista fl-attakk b’total ta’ 29 punt u seba’ three pointers u Riolo bid-difiża tagħha fuq Gladiana Avila tant li l-internazzjonali Messikana spiċċat b’14 -il turnover.Għal Charles Bonnici dan kien l-ewwel unur tiegħhu ma’ Starlites li minn naħa tagħhom rebħu t-tielet shield wara s-suċċessi tal-2018 u l-2019. Għal Luxol kienu nieqsa players bħal Anna Fenech Pace, Paula Ellul u Beverlee Zammit b’Mandi Mercieca wkoll mhux mija fil-mija tant li Santino Coppa ħallija barra mill-ewwel ħamsa. Intant il-partita fetħet bi break ta’ 8-2 minn Starlites bil-punti ta’ Christina Curmi, Maria Bonett, Amelia Simmons u De Martino. Starlites kellhom ukoll l-ewwel żewġ trippli ta’ De Martino u għalkemm Luxol irrispondew permezz ta’ Josephine Diaby u Avila, Starlites temmew l-ewwel taqsima 16-9 minn fuq. Fit-tieni taqsima, Liuxl naqqsu d-distakk għal basket wara punti minn Avila u l-aħwa Lisa u Sarah Fenech Pace. De Martini wieġbet mill-ġdid għal Starlites u għalkemm Luxol kellhom 5 punti mingħajr risposta, Starlites daħlu jistrieħu 30-24 minn fuq.
Fit-tielet taqsima, Luxol kellhom bidu tajjeb però hekk kif waslu sa’ basket ‘l bogħod, De Martino sammret żewġ trippli konsekuttivi. Dan ma kienx biżżejjed għaliex wara li Luxol kellhom 4 punti minn Diaby u Avila, Starlites għamlu break ieħor ta’ 9-0 minn Riolo, Michela Zammit Cordina u trippla ta’ De Matino u temmew is-sessjoni 49-37 minn fuq. Starlites kien jonqoshom biss sitt punti biex jerbħu l-partita u għamlu dan biż-żewġ trippli ta’ De Martino u Riolo biex ħarġu rebbieħa 55-40. Fi tmiem il-partita l-captainta’ Starlites Steffi De Martino irċeviet it-trofew minn għand il-President tal-MBA Paul Sultana fost il-ferħ tal-partitarji numerużi ta’ Starlites.
Caffè Moak Luxol: C. Sollami 3, M. Mercieca 4, L. Fenech Pace 6, H. Galea, G. Avila 16, K. Portelli, M. Camilleri, S. Fenech Pace 2, J. Diaby 9, J. Said, S. Sciberras, M. Marmara.
Starlites FIJO: M. Zammit Cordina 2, M. Riolo 5, A. Saliba, M. Sciberras, M. Bonett 2, S. De Martino 29, M. Fenech 2, A. Simmons 9, C. Cilia, L. De Martino, S. Davies, C. Curmi 6.
Referees: Gordon Barbara,Nicky Azzopardi, Florentina Ciurariu.
.
