Sitt baħrin tan-Navy Olandiża minn bastiment tal-gwerra li qed iżur Malta ġew immultati talli ħarqu flares waqt partita futbol fil-grawnd nazzjonali ta Ta Qali t-Tlieta filgħaxija. Thomas Claasen, 25, Dario Antonio Pool, 20, Maikel Baars, 32, Antonios Tsirkoudis Tempel, 27, Saverio De Greef, 23 u Panayotis Mihoglu, 52, li kollha jaħdmu abbord il-frejgata Zr.Ms. De Zeven Provinciën, li bħalissa tinsab fil-port fil-Port il-Kbir, tressqu quddiem il-Maġistrat Donatella Frendo Dimech.
Il-baħrin kienu qed jiċċelebraw r-riżultat ta’ partita ta’ ħbiberija internazzjonali bejn it-timijiet tan-nisa Awstrija vs Olanda. It-tim Olandiż rebaħ il-partita 4-0. L-Ispettur Ritienne Gauci akkuża lill-irġiel li ħarqu l-pirotekniċi, magħrufa bħala Bengal lights, mingħajr liċenzja, li ġabu ruħhom b’mod abbużiv ġewwa grawnd sportiv u li aġixxew b’mod li jikkostitwixxi ksur tal-paċi pubblika.
L-Ispettur Gauci esebixxa kopja ta’ filmati tal-inċident mill-ground tal-futbol. L-ewwel reat huwa punibbli b’multa sa €350, it-tieni b’multa sa €200, qalet il-Maġistrat. L-irġiel wieġbu ħatja u waqt li kienet qed tindirizza lill-baħrin, il-Maġistrat għarrfithom bil-piena li setgħu jirċievu, u tathom l-opportunità li jaħsbuha fuq il-ħtija tagħhom.
L-irġiel iżda ikkonfermaw l-ammissjonijiet tagħhom ta’ ħtija. Fis-sottomissjonijiet tiegħu dwar il-piena, l-avukat difensur Daniel Buttigieg issuġġerixxa li jeħlu multa, u sostna li l-inċident ma kienx wieħed serju. Il-Qorti qablet, u ddeċidiet li ma deherx li kien hemm malizzja fl-azzjonijiet tal-irġiel.
Fil-kunsiderazzjonijiet tagħha dwar il-piena, il-Qorti żiedet tgħid li tifhem li dawn il-prattiċi dehru li huma permessi fl-Olanda, iżda qalet li mhux l-istess f’Malta. Il-Qorti mmultat lill-irġiel €400 kull wieħed u pprojbithom milli jidħlu f’xi grawnd sportiv f’Malta għal perjodu ta’ sena.
