“Hawnhekk ma baqa’ xejn tagħna”. Hekk stqarru r-residenti tal-Mtarfa, hekk kif il-Ħamis waranofsinhar Net News kien preżenti waqt protesta kontra l-għeluq tal-iskola Primarja tal-Mtarfa.
Ġenituri tal-istudenti ċkejknin li jattendu din l-iskola, tennew li x-xewqa tagħhom hi li uliedhom ikollhom skola fejn jistgħu jattendu fir-raħal tagħhom, bħal irħula oħra.
Dan mhux l-ewwel każ fejn ittieħdilhom dak li hu tagħhom, hekk kif stqarrew li fil-passat, l-iskola Sekondarja inbiegħet lill-barranin, filwaqt li għalqulhom diversi faċilitajiet tal-isport.
Omm ta’ tifel ta’ 3 snin, b’dieqa tenniet, li t-tifel spiċċat ikollha tibgħatu l-iskola bil-minibus, minħabba l-fatt li t-tfal ġew rilokati fl-iskola tal-Msida, b’hekk il-ġenituri u uliedhom spiċċaw f’realtà fuq ħoġorhom li lanqas biss qatt bassru.
Dan filwaqt li kompliet tispjega li ulied il-komunità tal-Imtarfa m’għandhomx fejn jirrikreaw ruħhom fejn saħansitra anke l-bandli tħalla fi stat dilapidat.
Dan mingħajr ebda ħjiel ta’ kemm se jkunu qed idumu jattendu skola l-Imsida. Hi stqarret ukoll li dan mhux aċċettabbli.
Huma komplew jisħqu, li l-qofol ta’ kollox hi l-edukazzjoni, li ġiet misruqa mill-Imtarfin issa li għalqet l-unika skola li kien fadal fir-raħal.
Dan filwaqt li sar appell lill-Gvern ta’ Robert Abela, sabiex jerġgħu jiftħulhom l-iskola Primarja wara li ssir it-tiswija kollha neċessarja sabiex it-tfal ikunu jistgħu jattendu l-iskola fir-raħal tagħhom.
Iżda s-sentiment tal-Imtarfin huwa wieħed, dak li l-Gvern abbandunahom għal riħhom.
