Kmieni s-Sibt filgħodu, numru ta’ fotografi Maltin inġabru ma’ grupp ta’ fotografi Irlandżi sabiex jaqsmu d-delizzju tagħhom ma’ xulxin.
Il-Malta Photographic Society, li ilha mwaqqfa għal 62 sena, laqgħet grupp ta’ 17-il fotografu Irlandiż f’Bormla – mill-club fotografiku bl-isem ta’ Dublin Camera Club, club li ilu mwaqqaf il-fuq minn 75 sena, fl-Irlanda.
Stephen Buhagiar, il-president tal-MPS, spjega ma’ NetNews li l-ħsieb wara din il-kolaborazzjoni hi li l-membri taż-żewġ assoċjazzjonijiet jersqu iżjed fil-qrib ta’ xulxin, u b’hekk jaqsmu l-esperjenzi tagħhom ma’ xulxin. Filwaqt, li tingħata l-opportunità lill-fotografi Maltin sabiex jiltaqgħu ma’ dawk internazzjonali.
Filwaqt li spjega, kif din l-attività se tiftaħ il-bieb għal fotografi Maltin, sabiex jaqsmu it-talenti u l-għarfien tagħhom ma’ fotografi internazzjonali permezz ta’ diskussjonijiet varji.
Hu stqarr ukoll, li qed jesploraw iċ-ċans li fotografi tas-soċjetà jmorru jduru l-Irlanda sabiex itejjbu l-fotografija internazzjonali.
Dan se jagħti ċ-ċans, li fotografi Irlandiżi, ikunu parti mill-ġurija tal-kompetizzjoni nazzjonali tal-fotografija li ssir kull sena mill-Malta Photographic Society, għal-ħabta ta’ Diċembru.
Il-president ta Dublin Camera Club, Paul Stanley tkellem ma’ NetNews, hekk kif stqarr li l-għan tagħhom wara din iż-żjara f’pajjiżna hu li jkabbru l-għarfien tagħhom fuq Malta, filwaqt li jsaħħu r-relazzjoni tagħhom mas-soċjetà fotografika Maltija.
Hu spiċċa billi qal li għalkemm it-temp Malti mhux dejjem ippermetta x-xogħol tagħhom, se jibqgħu japprezzaw ix-xeni Maltin fix-xogħol tagħhom.
