Raġel ta’ 60 sena residenti San Ġwann ġie ikkundannat sentejn ħabs sospiżi għal erba’ snin wara li nstab ħati fuq ħasil ta flus. Carmelo Butler instab ħati li fil-25 ta’ Jannar 2002, u fix-xhur ta’ qabel, wettaq ħasil ta’ flus billi kkonverta propjetà li kien jaf li d-dħul tagħha kien ġej minn attività kriminali.
Il-Qorti fis-sentenza tagħha qieset il-kondotta tal-imputat, kif aġġornata sas-sena 2016, li hija waħda refrattarja u tinkludi piena ta’ 22 sena priġunerija effettiva mogħtija mill-Corte D’Assise ta’ Sirakuża, l-Italja talli għen fi dħul illegali ġewwa lItalja, oltre sejbien ta’ ħtija u kundanni dwar fost oħrajn, reati kontravvenzjonali, reati bi ksur tal-Kap. 65 u tal-Kap. 104 tal-Liġijiet ta’ Malta, li kkaġuna offiżi ta’ natura ħafifa, serq aggravat, riċettazzjoni, falsifikazzjoni ta’ dokumenti u frodi b’egħmil qarrieqi.
Fis-sentenza tagħha l-Qorti qieset ukoll in-natura serja tar-reat li tiegħu l-imputat qed jinstab ħati, iżda tqis in oltre mill-banda l-oħra illi r-reat li tiegħu qed jinstab ħati jmur lura għas-sena 2002 u x-xhur ta’ qabel, u illi d-dewmien fil-proċeduri kien dovut fil-maġġor parti tiegħu għall-fatt illi l-istess imputat kien qed jiskonta piena karċerarja ġewwa l-Italja, liema fatt wassal sabiex is-smigħ f’dawn il-proċedura jibda fis-sena 2014.
Il-Qorti qieset ukoll illi kien hemm ħafna dewmien ieħor f’dawn il-proċeduri, li fil-fehma tagħha, ma kienx dovut għal xi raġunijiet attribbwibbli lillistess imputat. Il-kawża kienet appuntata għall-ewwel darba għas-smigħ għall-14 ta’ Diċembru 2004 iżda Butler kien qed jiffaċċja proċeduri kriminali fl-Italja.
Il-kawża kienet differita sakemm Butler jidher quddiem il-Qorti bl-Ispettur Paul Vassallo, li mexxa l-prosekuzzjoni flimkien mal-Asssitent Kummissarju Ian Abdilla, informa lill-Qorti li Butler kien qed jiskonta piena ta’ ħabs l-Italja. Butler deher għall-ewwel darba fil-Qorti fis-7 ta’ Mejju 2014 u għall-ewwel wieġeb mhux ħati imma wara numru ta’ seduti ammetta bil-Prosekuzzjoni u d-difiża qablu li għandu jiġi kkundannat sentejn ħabs sospiżi għal erba’ snin.
Mill-provi rriżulta li kontijiet ta’ bintu Stephanie intużaw minn martu Carmen, li kellha prokura bankarja, sabiex flus ta’ żewġha jiġu depożitati fihom. L-omm u l-bint ukoll tressqu fil-Qorti fejn il-bint ma nstabitx ħatja u kienet illiberata waqt li l-omm instabet ħatja u kienet ikkundannata sentejn ħabs sospiżi għal erba’ snin.
Dwar il-piena fil-konfront ta’ Carmelo Butler, il-Maġistrat Natasha Galea Sciberras qalet li din tinkludi diversi reati fosthom 26 sena ħabs fl-Italja fuq traffikar ta’ persuni, ġrieħi ħfief fuq persuni, serq, pussess ta’ affarijiet misruqa, falsifikazzjoni ta’ dokumenti u frodi.
Il-Maġistrat Galea Sciberras qalet li ma kinitx se tordna l-konfiska ta’ dak li rriżulta li nkiseb b’mod illegali għax dan kien diġà ġie kkonfiskat fis-sentenza li ngħatat fil-konfront ta’ Carmen Butler. Il-Qorti wissiet lill-ħati bi kliem ċar u sempliċi bil-konsegwenzi skont il-liġi kemm il-darba huwa jwettaq reat ieħor punibbli bi priġunerija fil-perjodu operattiv tas-sentenza sospiża.
