Studenti Graffitti, il-fergħa studenteska tal-Moviment Graffitti, tinsab imħassba dwar l-apprendistati bla ħlas li qed jiġu offruti fil-Careers Expo tal-KSU li hemm għaddejja bħalissa.
Fl-istqarrija qalu li qed jissorveljaw is-sitwazzjoni kif ukoll qed jissuspettaw li l-kumpaniji qed joffru apprendistati bla ħlas lil studenti li qed ifittxu opportunitajiet ta’ xogħol barra l-ħinijiet tal-università. Studenti Graffitti issa tista’ tikkonferma li mill-inqas tliet intrapriżi involuti fil-Careers Expo 2023 tal-KSU qed joffru opportunitajiet ta’ apprendistati bla ħlas.
Studenti Graffitti ma teskludix li hemm aktar minn dawn it-tliet każijiet, filwaqt li ssostni li l-istudenti kollha li jaħdmu bħala interns għandhom dejjem jitħallsu paga li biha tista’ tgħix. Huwa kompletament inġust u inuman li l-istudenti jieħdu apprendistati biex jiksbu l-esperjenza fil-qasam ta’ studju tagħhom mingħajr ma jitħallsu għax-xogħol iebes li jagħmlu.
Din l-għaqda tinsisti li l-KSU, bħala kunsill tal-istudenti, jieħu azzjoni u jsemma’ leħnu biex kull student jitħallas għall-apprendistati offruti mill-kumpaniji kollha li qed jieħdu sehem fil-Careers Expo. Huma jitolbu wkoll li l-KSU jikkundanna kull kumpanija li tirrifjuta l-ħlas lill-interns tagħha.
Barra minn hekk, il-KSU ilu jippromwovi kumpaniji privati bħala parti mill-kampanja tiegħu għall-Careers Expo. Studenti Graffitti ma tistax tifhem kif entità pubblika qed tippromwovi u tinvesti r-riżorsi tagħha f’intrapriża privata li ma tibbenefikax direttament lill-istudenti, u lanqas mhi sponsor tal-korp studentesk.
Studenti Graffitti ttenni t-talba tagħha biex il-KSU jerġa’ jikkunsidra l-mudell ekonomiku tiegħu ta’ sostenibbiltà, billi jitbiegħed minn sponsorships privati u jikkunsidra dawk pubbliċi, jew permezz ta’ investiment governattiv jew inkella ta’ finanzjament dirett tal-istudenti.
