“Kollox ikkontrollat – stazzjon nazzjonali immexxi minn Kastilja”.
Hekk stqarr l-opinjonista Peppi Azzopardi waqt intervista fil-programm NETLIVE, wara li l-PBS instab ħati mill-Qorti ta’ żbilanċ favur il-Partit Laburista u l-Gvern ta’ Robert Abela.
Peppi Azzopardi tenna, li din is-sentenza tal-Qorti, mhux biss ingħatat kontra l-PBS, iżda anke kontra l-Awtorità tax-Xandir. L-istess awtorità li suppost iżżomm bilanċ fuq ix-xandir, f’pajjiż demokratiku. Iżda minflok, qed tiżgwida lill-poplu milli jinghata l-informazzjoni kollha.
Peppi Azzopardi ġab ukoll diversi eżempji ta’ kif qed jaħdem il-PBS biex jaġevola lill-Gvern.
Waqt NETLIVE, Peppi Azzopardi spjega l-importanza li fuq ix-xandir jiġu preżentati l-opinjonijiet kollha; u mhux ta’ partit wieħed.
Hu stqarr li dawn l-affarijiet ma jiġrux f’pajjiż demokratiku, u li kieku kien pajjiż ieħor, skandli kbar minn naħa tal-Gvern jiġu diskussi u mxandra fuq ix-xandir nazzjonali u mhux moħbijin.
Fl-2020, il-Prim Ministru Robert Abela kien wiegħed riformi fix-xandir, riformi li ma sarux – anzi waqqaf il-programmi li joħolqu diskussjoni dwar dak li qed jiġri f’pajjiżna. U huwa għalhekk, li l-Gvern ħataf ix-xandir taħt idejh.
Fl-aħħar jiem, il-PN qal illi l-aġir tal-PBS huwa inaċċettabbli għaliex il-poplu għandu dritt jisma l-verità u l-aħbar kif suppost. Filwaqt illi insista li l-poplu jixraqlu aħjar.
