Matul din is-sena qegħdin isiru diversi avvenimenti fit-Teatru Rjal fil-Belt Valletta sabiex jikkomemoraw l-għaxar anniversarju min mindu dan it-teatru reġa fetah għall-pubbliku.
Dan intqal mill-Perit Joe Cassar, ic-Chairman ta’ Pjazza Teatru Rjal, waqt id-diskors tiegħu fil-Green Room tat-Teatru Rjal fejn fisser is-sinifikat li għandu t-teatru, bħala wieħed mill-iżjed imfittxija speċjalment matul is-sajf, minħabba l-livell għoli ta’ kultura li jwassal kull sena.
Kemm Cassar kif ukoll id-Direttur tat-Teatru, is-Surmast Christopher Muscat, għamlu referenza għad-diversi avvenimenti li ser isiru fit-teatru matul ix-xhur li ġejjin, fosthom il-kunċert mill-band Olandiża “The Dutch Eagles”, kunċert tal-opra minn Edith Cavell ta-kompożitur Malti Paolino Vassallo, produzzjoni bl-isem Luxuria bi żfin u mużika flamengo minn artisti ġejjin minn Barcelona, kif ukoll spettaklu mit-truppa Ġappuniżi ta’ Taiko Drummers bl-isem Ondekoza, kif ukoll diversi kunċerti oħrajn li se jibqgħu għaddejjin sa Diċembru.
Il-kunċert annwali Notte Italiana ser ikun qed jittella’ fl-10 u fil-11 t’Awwissu, fejn l-ikona Taljan tal-pop Pupo ser ikun qiegħed jagħti kunċert sħiħ ta’ mużika flimkien mal-Malta Concert Orchestra.
Apparti dawn is-serati….is-sensiela popolari ‘Iljieli fit-Teatru’ hi ċelebrazzjoni ta’ mużika li bdiet f’ Jannar permezz tal-Għana Malti u kompliet fis-27 ta’ Frar permezz tal-Jazz. Din ser tkompli f’ Marzu u April …imbad wara s-sajf terġa tkompli minnn Ottubru sa Diċembru bi stili differenti ta’ mużika. Id-dħul għal attivitajiet ta’ Iljieli fit-Teatru huwa b’xejn. Id-direttur tat-Teatru fakkar li studenti u anzjani għandhom skont ta’ 50%, bhala parti mill-inizjattiva tagħhom biex l-arti u l-kultura tkun aċċessibli għal kulħadd.
