Studenti tal-Liċeo fil-Ħamrun flimkien mal-għalliema tagħhom, f’ġest nobbli, bnew tinda li tixbaħ id-djar li fihom jgħixu nies foqra, fl-Afrika. L-inizjattiva saret f’kolaborazzjoni ma’ Missio Malta – entità non-governattiva li tgħin lil nies li jgħixu f’villaġġi inqas żviluppati.
L-attività tat-Tnejn fil-Liċeo saret biex it-tfal ikunu jistgħu jempatizzaw ma’ min għandu inqas xorti minnhom – billi jieħdu idea tal-mod kif jgħixu.
NetNews tkellem ma’ Nancy Camilleri, il-kordinatur tat-tfal mal-Missio, fejn stqarret li dan il-ġest żgħir imma nobbli jista’ jfisser ħafna għal dawn it-tfal fil-bżonn. Hi qaltilna illi tittama li t-tfal tal-Liċeo, ikunu eżempju għall-poplu Malti sabiex jgħin lill-popli tal-Afrika.
Is-Surmast tal-Liċeo, Ġorġ Galea, flimkien mat-tfal u l-għalliema responsabbli minn din it-tinda, tkellmu ma’ NetNews fejn stqarru li bħala skola huma kburin b’dan il-proġett.
L-għaqda non-governattiva, Missio, se tkun qed itella’ maratona bl-isem Hope Missio Fest, sabiex tiġbor il-fondi għan-nies fil-bżonn fl-Arfika, nhar is-Sibt 11 ta’ Marzu, mill-11 ta’ filgħodu sal-11 ta’ filgħaxija. Net TV se jkun ukoll qed ixandar din il-maratona.
