Il-Ministru Michael Falzon ma tax garanzija li l-flus li nsterqu mill-poplu Malti permezz tad-deal mal-Vitals u Steward se jingħataw lura; flus li jlahhqu miljuni kbar ta’ ewro. Dan filwaqt li qed jibqa’ ma jweġibx meta mistoqsi jekk il-Gvern ta’ Robert Abela hux se jiftaħ kawża kontra Steward Health Care.
Kien il-Kap tal-Partit Nazzjonalista Bernard Grech, illi l-Ħadd appella lil Robert Abela sabiex jiftaħ kawża ħalli l-poplu Malti jieħu lura l-miljuni ta’ ewro li nsterqulu. Iżda meta l-Ministru Falzon ġie mistoqsi minn Net News, baqa’ ma tax garanzija li l-Gvern se jagħmel dan.
Kienet l-Assoċjazzjoni Medika Maltija illi l-Ħadd żvelat li d-deal frawdalenti li sar mill-Gvern ta’ Joseph Muscat ma’ Vitals, ġie jiswa’ lil pajjiżna madwar €390 miljun ewro.
Ma’ dan l-istazzjon, il-Ministru Michael Falzon ma weġibx lanqas meta mistoqsi min se jerfa’ ir-responsabbiltà; inkluż hu li kien membru fil-Kabinett ta’ Muscat. Iżda Falzon farfar mir-responsabbiltà – fejn indika li ma kienx parti mill-Kabinett li ffirma dan id-deal.
Meta pressat mill-ġurnalisti, il-Ministru Falzon – minflok wieġeb – wissa lill-media dwar il-mod kif isiru id-domandi.
Il-fatti huma li l-Ministru Michael Falzon kien membru tal-Kabinett meta sar dan id-deal frawdalenti.
Hu, fil-fatt, kien Segretarju Parlamentari, u b’hekk membru tal-Kabinett ta’ Joseph Muscat minn April tal-2014 sa Jannar tal-2016. Dan ifisser, li meta ġie ffirmat id-deal tal-Vitals – f’Settembru 2015 – hu kien parti mill-Kabinett.
