Kandidat Albaniż għat-test tal-liċenzja sewqan xehed fil-qorti li interpretu kien indika t-tweġibiet korretti għal ftit mistoqsijiet fit-test tat-teorija “biex ikun jista’ jgħaddi.” Ix-xhud, li ilu jgħix Malta mal-familja tiegħu aktar erba’ snin u nofs, kien ġie mħeġġeġ minn min iħaddmu fil-kumpanija bbażata f’Għawdex biex jikseb liċenzja tas-sewqan ta’ Malta.
Il-liċenzja Albaniża, li ma tgħoddx għal Malta kienet se tiskadi u liċenzja lokali kienet tkun utli kemm għax-xogħol kif ukoll għall-ħajja privata tal-familja tal-ħaddiem. Euchar Vella, Direttur fil-kumpanija fejn kien jaħdem l-Albaniż, xehed kif hu kien ilmenta personalment mal-Ministeru tat-Trasport dwar il-fatt li t-testijiet tas-sewqan tat-teorija ma kinux disponibbli bil-lingwa Albaniża.
Kemm min iħaddem kif ukoll l-impjegat xehdu quddiem il-Maġistrat Rachel Montebelli fil-kumpilazzjoni kontra Clint Mansueto – Direttur ta’ Transport Malta, Philip Endrick Zammit u Raul Antonio Pace, żewġ uffiċjali oħra ta’ Transport Malta li qed jiffaċċjaw akkużi għal allegat involviment f’każ ta’ korruzzjoni f’test tas-sewqan.
Peress li dak iż-żmien l-impjegat ta’ Vella ma kienx jaf jitkellem la bil-Malti u lanqas bl-Ingliż, kellu problema biex joqgħod għat-test tat-teorija. L-ebda traduzzjoni Albaniża ma kienet disponibbli. Ġurnata wara li ressaq l-ilment tiegħu, id-direttur irċieva telefonata mingħand Transport Malta.
Qalulu li se jkun hemm interpretu disponibbli, iżda kien ikollu jħallas għalih. Allura fit-2 ta ‘Settembru 2020, min iħaddem ħallas il-miżata. Ma setax jiftakar l-ammont eżatt iżda donnu kien taħt l-impressjoni li kienu €70 jew €120 li kien ħallas , qal Vella fil-Qorti.
Fl-awla ma identifika lil ħadd mill-akkużati. Il-kandidat Albaniż xehed li dakinhar tat-test, l-ewwel ta ftit tweġibiet. Qabel it-test, huwa kien tgħallem il-mistoqsijiet bl-Ingliż u t-traduttur tkellem miegħu bl-Ingliż. Madankollu, it- traduttur kien indika t- tweġibiet it- tajba għal tnejn jew tliet tweġibiet li kienu ħżiena, “u dan sabiex ngħaddi,” spjega x- xhud.
Aktar tard l-uffiċjali qalulu li d-dettalji personali tiegħu fuq il-formola tal-applikazzjoni, li ma kienx mela hu, kienu żbaljati minħabba li n-nazzjonalità tiegħu ma ġietx imniżżla bħala Albaniża. Huwa għadda mit-test u kiseb il-liċenzja. Kandidat ieħor li għadda kien ċittadin tal-Pakistan li kiseb il-liċenzja tiegħu kemm għall-vetturi tal-kategorija B u D.
Ir-raġel, li jaħdem bħala xufier ta’ minibus, xehed li kien qagħad ħames darbiet għat-test tat-teorija tal-kategorija B tiegħu, u fl-aħħar għamel dan f’Ottubru tal-2021. Min iħaddmu kien ibbukkjalu t-‘test online’, filwaqt li hu personalment mar f’uffiċċju tal-Furjana biex jibbukkja servizz ta’ traduzzjoni waqt it-test. Huwa ħallas tariffa ta’ €60 għas-servizz u ngħata irċevuta.
Huwa kien segwa l-istess proċedura meta applika għat-test tal-liċenzja tal-kategorija D tiegħu, sempliċement iffirma formola li ngħatatlu fl-uffiċċju tal-Furjana. Għal darb’oħra ħallas €60 jew €65 kull darba. Huwa qagħad għal dak it-test tliet darbiet, kull darba kellu interpretu differenti.
Għalkemm kien talab interpretu Pakistani, it-traduttur tkellem miegħu bl-Ingliż u t-test kien bl-Ingliż ukoll. Mistoqsi kif irnexxielu, ix-xhud spjega li kien jaf il-mistoqsijiet permezz tal-esperjenza bħala xufier u meta ma setax jifhem xi wħud mill-mistoqsijiet, l-interpretu kien issimplifika l-kliem bl-Ingliż.
Asssitent Manager ta’ Tranport Malta li kienet l-aħħar xhud qalet li l-uniku ħlas li rċevew kien mingħand il-kandidat Pakistani fit-28 ta’ Jannar 2020. Is-sistema ta’ TM wriet applikazzjoni waħda biss. Il-każ ikompli fl-20 ta’ April fis-12.45pm.. L-Ispettur Wayne Borg tħarreġ, assistit mill-avukat tal-AG Abigail Caruana Vella. L-avukati Arthur Azzopardi u Jacob Magri assistew lil Mansueto. L-Avukat Joe Giglio assista lil Pace.
