L-MEP Nazzjonalista David Casa kompla jżid il-pressjoni tiegħu fuq il-Pulizija wara li ġie żvelat li rejd dwar korruzzjoni ġie mwaqqaf mill-Pulizija, rejd kien ordnat li jsir fuq aġenzija tal-istat b’rabta ma’ inkjesta maġisterjali.
Hu stqarr li “Iktar ma jgħaddi ż-żmien, il-Kummissarju tal-Pulizija, li suppost huwa responsabbli mill-prosekuzzjoni tal-kriminalità, qiegħed minflok ikompli jiddefendiha. Hemm aġenda sabiex jiġu protetti l-predeċessuri ta’ Robert Abela li qegħdin jkomplu jikkalpestaw l-integrità tas-sistema tal-ġustizzja. Dan ma huwa xejn għajr stat maħtuf mill-interessi tal-kriminali.”
Casa kiteb ittra lill-President tal-Kummissjoni Ursula von der Leyen u lill-Viċi President responsabbli mill-istat tad-dritt, Vera Jourova, li bagħtha wara xahar ta’ nuqqas ta’ azzjoni mill-Pulizija Maltija fl-iskandlu tal-Vitals/Steward, u aktar nuqqas ta’ azzjoni fl-iskandlu tal-wind farm ta’ Mozura fil-Montenegro, meta d-Dipartiment tal-Pulizija tar-Reati Finanzjarji mar kontra ordni maġisterjali biex issir tfittxija fil-bini tal-Enemalta.
Hu żied jikteb lill-Kummisjoni li “minkejja l-evidenza ċara daqs il-kristall ta’ korruzzjoni lampanti, l-investigazzjonijiet jidhru li qed jiġu mfixkla. Saħansitra, ġie ordnat rejd mill-maġistrat inkwirenti fil-bidu ta’ Diċembru…li sal-lum, id-Dipartiment tal-Pulizija tar-Reati Finanzjarji irrifjuta li jwettaq. B’hekk, jidher ċar li l-Pulizija qiegħda kontinwament tagħmel il-bsaten fir-roti lill-ġustizzja Maltija, u qiegħda tfixkel ix-xogħol tal-inkjesta maġisterjali b’intenzjoni waħda li jibbenefikaw biss dawk li jinsabu fil-poter, dawk il-kriminali li serqu l-kaxxa tal-istat.”
Casa ċanfar lill-Gvern Malti għar-riformi fażulli tiegħu li baqgħu fuq il-karta u li kienu sempliċiment strateġija ppjanata sabiex jitwaqqaf l-iskrutinju għall-kollass fil-prosekuzzjoni ta’ korruzzjoni fl-għola livelli mwettqa minn uffiċjali tal-Gvern Laburista, filwaqt li faħħar lil dawk li qattgħu snin jiġġieldu għas-saltna tad-dritt fin-nuqqas ta’ Pulizija effettiva.
Casa fakkar fl-ittra tiegħu lil Von Der Leyen ta’ meta hija ħadet il-kariga tagħha bħala President tal-Kummissjoni Ewropea u ta’ meta kien hemm il-protesti tal-2019, hekk kif l-amministrazzjoni ta’ Muscat kienet ser tasal fi tmiema. “Malta dakinhar kienet fuq xifer l-irdum. Pero llum nistgħu ngħidu li s-saltna tad-dritt baqgħet sejra lura minn dakinhar għax is-suċċessur ta’ Muscat mhuwiex kapaċi li jipproċedi kontra l-korruzzjoni, jew agħar minn hekk, l-aġir tiegħu qed isaħħaħ l-impunità ta’ Muscat u lill-kompliċi kriminali tiegħu,” l-ittra tikkonkludi.
