Il-qawwiet tar-Russja, fl-aħħar sigħat, attakkaw lil diversi bliet tal-Ukrajna fejn inqatlu u ndarbu numru mhux determinat ta’ ċivili f’zona residenzjali fir-reġjun ta’ Kiev.
Il-missili laqtu numru ta’ bini, fosthom żewġ dormitorji tal-istudenti, fil-belt ta’ Rzhyshchiv, fil-limiti tal-kapitali — bil-kelliema għas-servizzi tal-emerġenza jikkonfermaw numru ta’ tfal fost il-midruba. Kienu anki rappurtati diversi nies nieqsa f’dik iz-zona,
Il-gwerra, intant, kompliet fuq numru ta’ fronti, bl-uffiċjali fil-Krimea li jappoġġjaw lir-Russja jsostnu li rnexxielhom jiddefendu ruħhom kontra attakk mid-drones tal-Ukreni li jingħad kien immirat għall-bastimenti tal-gwerra mal-Flotta Russa tal-Baħar l-Iswed. Ir-Russi fl-aħħar sigħat irrappurtaw li d-drones sfaw meqruda u li l-bastimenti inkwistjoni ma ġarrbu l-ebda ħsarat.
Fl-istess ħin, ir-residenti fil-belt tal-port ta’ Sevastopol irrappurtaw sensiela ta’ splużjonijiet fl-inħawi. Dan waqt li attakk ieħor separat mir-Russi fuq bini viċin ta’ monasteru f’Odesa issarraf f’numru ta’ midruba – bir-Russja anki tispara d-drones lejn ir-reġjun Ukren ta’ Zhytomyr.
Wara sar magħruf li fl-aħħar offensiva qalila ntużaw anki l-ajruplani tal-gwerra tar-Russi li kapaċi jġorru l-missili għal fuq id-distanzi kbar.
Il-President tal-Ukrajna, Volodymyr Zelensky, qal li pajjiżu, fl-aħħar sigħat, kellu jsofri offensiva ġdida tar-Russi li bbażat fuq il-missili, l-artillerija u d-drones speċjalizzati għall-attakki militari. U waqt li rrefera għaż-żjara mitmuma tal-President taċ-Ċina fir-Russja, Zelensky qal li ‘kulmeta xi ħadd ilissen il-kelma ‘paċi’ f’Moska, malajr toħroġ xi direttiva għal aktar attakki (fuq l-Ukreni)’.
Qabel telaq minn pajjiżu l-President Ċiniż Xi Jinping, il-President Russu Vladimir Putin kien sostna li diversi elementi tal-pjan għall-paċi mressaq miċ-Ċina jistgħu jiffurmaw il-bażi għal ftehim dwar l-Ukrajna u dment li l-Ukreni u l-Punent huma lesti li jaċċettawhom. Il-pjan, iżda, ma għamel l-ebda proposti speċifiċi u lanqas ma jsejjaħ biex it-truppi Russi jitilqu mill-artijiet tal-Ukrajna.
//= $special ?>