Rosianne Cutajar ripetutament siefret lejn Dubaj għal waqfiet ta’ 48 siegħa biss… iżda ħadd ma jaf x’kienet tmur tagħmel u wisq inqas ma’ min kienet tiltaqa’.
Dan ġie żvelat mal-gazzetta Il-Mument wara li kienu ġew ippublikati chats bejn id-deputat Laburista u l-imprenditur Yorgen Fenech… chats li kkonfermaw dak l-abbużi tal-poter mill-Gvern Laburista.
Fid-dawl tas-safriet frekwenti minn Malta lejn Dubaj u lura… safriet li kienu jsiru kull xahrejn jew tliet xhur… ġie mistoqsi l-mottiv wara dawn is-safriet hekk kif ħadd ma jaf eżatt għalfejn kienet tmur l’hemmhekk.
Fl-aħħar ġimgħat, Rosianne Cutajar kienet spiċċat fuq fomm kulħadd wara ċ-chats żvelati li jammontaw għal iktar minn 2,000 messaġġ… chats illi juru r-relazzjoni intima li kien hemm bejn Cutajar u Fenech, u li jiżvelaw informazzjoni sensittiva li għaddiet bejn dawn iż-żewġ persuni; informazzjoni li tirrigwardja personaġġi għolja fi ħdan il-Gvern tal-eks Prim Ministru, Joseph Muscat.
Mill-messaġġi ħareġ ċar illi Yorgen Fenech… kien jaf meta se jsir reshuffle tal-Kabinett… kien jaf min se jilħaq Kummissarju Malti fl-Ewropa…. Kien jaf dak li kien għaddej dwar l-eks Ministri Chris Cardona u Konrad Mizzi… kien ħaġa waħda ma’ Keith Schembri – f’kelma waħda ‘kien jaf kollox’…kull informazzjoni li kienet ġejja minn Kastilja. Tant li f’konversazzjoni minnhom id-Deputat Laburista tagħti parir lill-istess Fenech biex ikellem lill-Prim Ministru u lil Keith Schembri… b’Fenech jikkonferma li mar ‘jarah’.
F’dawn iċ-chats sar magħruf ukoll li Rosianne Cutajar kienet infurmat lil Yorgen Fenech li kienet se tagħmel bħal ħaddieħor…u tieħu job bħala konsulent fl-ITS għaliex kulħadd kien qiegħed jitħanżer. B’Rosianne Cutajar daħħlet fil-but mal-€81,000 minn job part time li kellha mal-ITS.
Fil-fatt, f’messaġġ partikolari Rosianne Cutajar kitbet preċiżament dawn il-kliem… “ħa nidħol konsulenta u ndaħħal paga oħra. Ma jimpurtanix, kulħadd jitħanżer.” Kliem perfett li jiddeskrivi preċiżament l-għaxar snin ta’ Gvern Laburista.
Fid-dawl ta’ dan kollu, Robert Abela għadu ma ħa l-ebda azzjoni dwar il-backbencher Laburista… tant li qed jagħżel li jżommha miegħu bħala parti mill-Grupp Parlamentari.
