Colin Schembri
Bupa Luxol………………74
Starlites FIJO……………91
(18-23)(17-25)(23-22)(16-21)
Ic-champions Starlites FIJO kisbu d-dritt li jiddefendu l-kampjonat li rebħu l-istaġun li għadda wara li kisbu t-tieni rebħa fis-semifinali tal-play-offs kontra Bupa Luxol biex dawn tal-aħħar temmew l-impenji tagħhom għal dan l-istaġun. Starlites kienu rebħu l-ewwel semi-finali 73-66 u fetħu t-tieni waħda bl-aħjar mod meta fl-ewwel minuti marru 12-2 minn fuq bil-punti ta’ Zakiah Owens u Ian Felice Pace li għamel l-ewwel trippla tal-partita. Wara time-out, Luxol ppruvaw jirkupraw fejn fost l-oħrajn kellhom trippla minn Trevian Bell iżda Starlites ukoll kellhom il-punti minn Darius George u three pointer ta’ Matthew Attard. Luxol naqqsu d-distakk bil-punti ta’ Marco Matijevic u trippla ta’ Juan Cefai għal skor ta’ 18-23. It-tieni sessjoni fetħet bi trippla fuq kull naħa bi Starlites ikomplu bi break ta’ 11-2 biex reġgħu marru 12 minn fuq 37-25. Hawn iż-żewġ timijiet bdew jirrispondu lil xulxin fejn Starlites kellhom it-three pointers minn Alec Felice Pace u Matthew Scerri biex daħlu jistrieħu 48-35 minn fuq.
Wara l-interval, Luxol kellhom bidu mill-aqwa b’run ta’ 12-0 b’żewġ trippli kull wieħed minn Bell u Nikola Vasovic. Wara li Starlites waqqfuhom bi trippla ta’ George Luxol għamlu 5 punti oħra biex marru punt minn fuq 52-51. Dan l-iskor reġa’ ġab lil Starlites f’posthom hekk kif il-players ta’ Paul Ferrante għamlu żewġ runs ta’ 12-0 u 7-0 biex sa’ tmiem is-sessjoni reġgħu fetħu vantaġġ komdu ta’ 12 -il punt 70-58. Starlites fetħu l-aħħar taqsima b’seba’ punti oħra mingħajr risposta qabel ma Luxol għamlu l-aħħar sforz tagħhom bi break qasir ta’ 8-2 bi trippla ta’ Jean Paul Schembri. Starlites għalqu l-partita b’run oħra ta’ 10-2 biex setgħu jikkontrollaw l-aħħar minuti u jaslu sal-finali b’rebħa ta’ 91-74.
Bupa Luxol: J. Cefai 7, N. Vasovic 8, M. Sciberras, T. Bell 21, JP Schembri 6, A. Trapani, L. Trapani, T. Mattos 17, M. Matijevic 15, S. Cappello.
Starlites FIJO: A. Felice Pace 18, Z. Owens 21, M. Attard 6, J. Bates 8, I. Felice Pace 12, M. Fabri, L. Riolo 2, M. Scerri 5, R. Carabott, L. Farrugia, K. Xuereb 3, D. George 16.
Referees: Bernard Vassallo, Gordon Barbara, Fiorentina Ciurariu
Depiro……………………….73
Mellieħa Libertas………85
(23-24)(12-15)(24-22)(14-24)
Wara t-tmiem stupend tal-ewwel semi-finali bejn dawn iż-żewġ timijiet, Mellieħa Libertas ġew lura fit-tieni partita meta għelbu lil Depiro 85-73. B’dan ir-riżultat, issa hemm bżonn it-tielet partita li hija skedata għas-Sibt li ġej f’12:00. Iż-żewġ timijiet kellhom bidla waħda mill-partita ta’ ġimgħa ilu fejn Depiro kienu mingħajr Nicholas Grech fil-waqt li Mellieħa rkupraw lil Samuel Zammit. Il-partita kellha bidu bilanċjat fejn wara li Mellieħa ħadu l-ewwel vantaġġ permezz ta’ Vukassin Jandric u Sebastian Valencia, Depiro wieġbu permezz ta’ Cameron Cornelius, Kameron Rooks u Sean Galea. Wara trippli ta’ Mellieħa minn Jandric u Robert Bonnici, Depiro ħadu l-vantaġġ perfezz ta’ Rooks. Il-vantaġġ kompla jdur minn naħa għall-oħra biex Mellieħa għalqu t-taqsima b’żewġ baskets ta’ Valencia għal skor ta’ 24-26. Fit-tieni sessjoni, l-punti naqsu għalkemm kienu Mellieħa li kabbru l-vantaġġ wara trippli minn Jandric u Valencia. Għal Depiro, kien hemm il-punti minn Rooks flimkien ma’ trippla ta’ Miguel Brincat biex Mellieħa daħlu jistrieħu erba’ punti minn fuq 39-35.
Wara l-mistrieħ il-vantaġġ ta’ Mellieħa reġa’ kiber għal 10 punti fejn għal darb’oħra kellhom it-trippli minn Jandric u David Bugeja. Depiro rrispondew bi break ta’ 14-4 li rahom jaslu sa punt ‘l bogħod u saħansitra marru minn fuq wara trippla ta’ Cornelius u basket ta’ Rooks 56-54. Mellieħa kellhom risposta bit-trippli ta’ Jovanovic u Valencia biex reġgħu ħadu l-vantaġġ 61-59. Fil-ftuħ tal-aħħar sessjoni Depiro reġgħu marru minn fuq wara punti ta’ Brincat u Cornelius qabel ma Mellieħa kellhom 5 punti konsekuttivi minn Jandric u Bonnici. Mellieħa komplew b’run deċisiva ta’ 10-2 b’aktar three pointers minn Jandric u Nenda Bukva u rnexxielhom jikkontrollaw l-aħħar tentattivi ta’ Depiro biex ħarġu rebbieħa 85-73.
Depiro: S. Galea 6, J. Micallef, A. Attard, S. Kenely, K. Rooks 36, M. Brincat 5, M. Mallia, C. Cornelius 26, A. Micallef, M. Debattista, K. Caruana.
Mellieħa Libertas: S. Zammit, M. Falzon, D. Bugeja 13, R. Bonnici 6, V. Jandric 19, I. Bonett, N. Bukva 9, N. Jovanovic 6, M. Formosa, O. Said, S. Valencia 32.
Referees: Daniella Torok, Zvezdan Dobrosaviljevic, Bogdan Mrkojevic
