Colin Schembri
ARMS Depiro………..57
Starlites FIJO…………68
(13-14)(14-27)(10-14)(20-13)
Se jkunu Starlites FIJO li se jaffrontaw lic-champions renjanti Caffè Moak Luxol fil-finali tal-kampjonat Mapfre MSV Life għal dan l-istaġun. It-team imexxi minn Charles Bonnici għeleb lil ARMS Depiro 68-57 biex wara r-rebħa tal-ewwel partita 72-52 kisbu post fil-finali. Depiro tħabtu speċjalment fl-aħħar taqsima iżda d-distakk kien kbir wisq għaliex bħal ma gralhom fl-ewwel partita kellhom isofru l-qawwa ta’ Starlites fit-tieni sessjoni. Depiro kellhom nieqsa lil Julia Xerri u Julianne Magri għal din il-partita. Kienu Starlites li ħadu l-ewwel vantaġġ wara trippli minn Mikela Riolo 10-5. Ir-risposta ta’ Depiro ġiet bi break ta’ 8-2 bil-punti ta’ Claire Ciantar, Neve Borg u Julia Borg biex Starlites temmew it-taqsima 14-13 minn fuq. Fit-tieni taqsima kien hemm trippla fuq kull naħa minn Steffi De Martino u Casey Samuels biex Starlites baqgħu basket minn fuq 20-18. Hawn wasal mument kruċjali fil-partita fejn Starlites kellhom run qawwija ta’ 20-4 b’diversi punti ta’ De Martino u Amelia Simmons. Sal-intervall, Depiro rnexxielhom inaqqsu xi ftit id-distakk wara trippla u baskets minn Samuels u Nicole Agius għal skor ta’ 41-27.
Fit-tielet sessjoni, Starlites komplew iżidu l-vantaġġ wara aktar punti minn De Martino, Simmons u Michela Zammit Cordina. Depiro damu biex irrispondew u sofrew trippla oħra ta’ De Martino qabel ma għamlu l-aħħar 4 punti tas-sessjoni għal skor ta’ 37-55. L-andament tal-partita nbidel fir-raba’ taqsima hekk kif Depiro fetħu b’run ta’ 12-2 bi trippla ta’ Samuels flimkien ma’ Ciantar u Leanne Duncan u naqqsu d-distakk għal 8 punti 49-57. Starlites irkupraw u kellhom basket ta’ Simmons u trippla ta’ Zammit Cordina però Depiro ppruvaw l-aħħar sforz li ssarraf f’ħames punti oħra. Il-ħin però kien kontra tagħhom u Starlites għalqu l-partita bil-punti ta’ Simmons u De Martino u ħarġu rebbieħa 68-57. L-appuntament issa għal Ħamis 20 t’April meta ssir l-ewwel finali l-aħjar minn ħamsa għar-rebħ tal-kampjonat.
ARMS Depiro: Ni. Agius 6, J. Mallia, L. Duncan 4, No. Agius, C. Ciantar 14, C. Samuels 22, J. Borg 10, M. Micallef, N. Borg 1, C. Fenech, L. Camilleri.
Starlites FIJO: M. Zammit Cordina 4, M. Riolo 7, A. Saliba, M. Sciberras, M. Bonett 3, S. De Martino 23, M. Fenech 2, A. Simmons 29, C. Cilia, K. Mifsud, S. Davies, C. Curmi.
Referees: Zvezdan Dobrosaviljevic, Nicky Azzopardi, Fanni Fabok
