“Sagħtejn qabel ma ġejna nfurmati li missieri kellu bżonn jiddaħħal għal operazzjoni urġenti konna ħdejh l-isptar. Ħriġna mis-sala għal xi nofsillejl u fis-2.20 ċemplulna li għandu bżonn operazzjoni urġenti. Qalbna qisha ħebritna. Ma kinetx xi ħaġa normali għalina llissnu l-kelma ‘I love you’ bejnietna, minkejja li dejjem ħabbejna ħafna ’l xulxin, imma qabel tlaqna minn ħdejh, lili u lil ħija qalilna “Ħa mmur norqod, I love you”. Dak il-lejl għedtlu “I love you”, u ħija wkoll qallu “Love you Pa.” Min kellu jgħidilna li dawn kellhom ikunu l-aħħar kliem li lissinna lil xulxin.
Kliem Karl Rizzo Naudi, meta tlabtu jgħidli xi tifkiriet tal-għażiż missieru Mario, proprju lbieraħ, fil-jum tad-difna tiegħu.
Karl qalli li missieru dejjem qeda d-dmir tiegħu ta’ tabib qabel kollox. Semmieli bħala eżempju meta kien għadu l-iskola u kellu funzjoni tal-Preċett. “Niftakar li dakinhar, aħna u ħerġin u sejrin lejn l-iskola, taret kamra tan-nar viċin id-dar tagħna u litteralment in-nies bdew iġorru l-feruti lejn id-dar tagħna.
“Missieri ma ħasibhiex darbtejn, tani bewsa u qalli ‘taf li jiena tabib u dmiri jiġi l-ewwel.’ Waqt li qed jgħidli hekk biesni u qalli ‘mur u ħu gost u skużani,ma nistax nattendi.’ Dak il-ħin rajtu jinża’ l-ingravata u beda jużaha bħala faxxa biex iwaqqaf id-demm minn wieħed mill-feruti.”
Ikompli jirrakkonta Karl: “Min jaf kemm-il lejl għamilna reqdin id-dar jiena, ħija u l-mamà għax il-papà kien night duty. Meta beda jaħdem għal rasu min jaf kemm-il darba smajna t-telefon tad-dar idoqqf’nofs ta’ lejl, anki fis-2 ta’ filgħodu, għax dan kien żmien qabel il-mobile, tarah jilbes u f’ħakka t’għajn ikun diġà telaq u mar jgħin lill-pazjent fil-bżonn.Dawk huma ftit mill-eżempji ta’ kemm missieri kellu l-professjoni tal-mediċina għal qalbu.”
Karl qal li l-memorji tiegħu u ta’ ħuh dwar missierhom kienu kollha sbieħ. “Qatt ma webbilni biex nipprattika sport jew ieħor. Id-deċiżjoni dejjem kienet tiegħi u ta’ ħija imma dejjem, kull meta jien għażilt sport – jiena minn mindu kelli 10 snin intfajt fil-waterpolo – kien dejjem hemm biex jistaqsini kif mortu llum? Kif ħassejtek mort? Ma kienx wieħed minn dawk li jiġi jara l-logħob, ovvjament minħabba x-xogħol tiegħu, imma meta niltaqgħu l-ewwel darba, l-ewwel ħaġa li jgħidli kienet tkun ‘smajt li lgħabt tajjeb illum’, b’dik it-tbissima kbira fuq wiċċu.
Meta daħħalnieh l-isptar ovvjament kien xokk qawwi, għax ftit tas-sigħat qabel kien luċidu u kellimni. Konna erġajna daħħalnieh għax beda jiddeterjora daqsxejn u t-tobba fl-emerġenza riedujagħmlu l-investigazzjonijiet. Għall-inqas nista’ngħid li smajt l-aħħar kelmiet ta’ missieri: ‘Ħa mmur norqod, I love you boys’.”
“Ta’ missieri kellna, u jibqa’ jkollna, tifkiriet sbieħ biss,” temm jgħidli Karl Rizzo Naudi.
Fjuri quddiem il-klinika tat-tabib Mario Rizzo Naudi ilbieraħ…ritratt li juri kemm kien raġel maħbub u rispettat
