Colin Schembri
Starlites Mazars……63
Luxol…………………..69
(15-19)(12-21)(16-8)(20-21)
Fl-ewwel finali mill-kampjonat tas-subien taħt is-sittax –il sena, Luxol ħadu l-ewwel rebħa fuq Starlites Mazars 69-63. Starlits offrew sfida qawwija u għal darbtejn wettqu rimonta li wasslithom viċin ferm tal-avversarji però finalment Luxol irnexxielhom jagħlqu l-logħba favurhom. It-timijiet huma mmexxija minn players tat-team tal-kbar, Alec Felice Pace għal Starlites u Jean Paul Schembri għal Luxol. Attendenza numeruża attendiet għal din il-finali li rat lil Luxol jiftħu tajjeb u jieħdu l-ewwel vantaġġ ta’ 11-3 fejn fost l-oħrajn kellhom trippla minn Jake Gambin u punti minn Mark Iloube. Ir-risposta ta’ Starlites ġiet bi tlett baskets konsekuttivi qabel ma Julian Gouder għamel żewġ trippli oħra għal Luxol. Starlites ukoll kellhom trippla oħra minn Matthew Micallef għal skor ta’ 15-19. Fit-tieni taqsima Luxol bdew jinqatgħu fuq quddiem fost l-oħrajn bi trippla oħra ta’ Gambin flimkien ma’ Greg Mizzi u Gouder. Huma fetħu vantaġġ ta’ 14 –il punt, 34-20 għalkemm Starlites wieġbu mill-ġdid bil-punti ta’ Sebastien Pace, Matthew Micallef u JJ Dimech għal skor ta’ 40-27 fl-intervall.
Wara l-mistrieħ, kien hemm basket fuq kull naħa qabel ma Starlites bdew l-ewwel rimonta tagħhom. Fil-fatt, punti kontinwi minn Micallef u Pace f’run ta’ 14-2 rawhom jaslu sa’ punt ‘l bogħod mill-avversarji 43-44. Punti minn Stefan Merra u Cinar Cog taw ftit tan-nifs lil Luxol li temmew il-perjodu 48-43 minn fuq. Fl-aħħar taqsima, kienu Luxol li fetħu l-aħjar u u għamlu run ta’ 12-0 biex fetħu vantaġġ komdu ta’ 17 –il punt 60-43. Madankollhu, Starlites ma ċedewx u sensiela ta’ trippli konsekuttivi minn Jamie Dumford, Pace u Kai Fabri reġgħu wassluhom sa’ tlett punti ‘l bogħod 63-66. Il-ħin però kien favur il-vjola tal-Luxol li għamlu l-aħħar punti tal-partita permezz ta’ Ilouke biex ħarġu rebbieħa 69-63.
Starlites Mazars: Michael Xuereb, Sebastien Pace 14, Andrew Barbara, Neil Spiteri 2, Kai Fabri 5, Kyle Deguara 6, Luke Borg, Jake Caruana, Matthew Micallef 19, Jamie Dumford 6, Steve Ransley, JJ Dimech 11.
Luxol: Spartaco Montanari, Aleksander Matijevic, Jake Gambin 6, Cinar Cog 17, Stefan Marra 17, Mark Iloube 13, Greg Mizzi 2, Thomas Cummins, Julian Gouder 12, Dominic Lubiniy, John Attard, Eric Fenech Pace 2.
Referees: Daniel Farrugia, Nicky Azzopardi.
