Il-qawwiet taċ-Ċina wettqu simulazzjoni ta’ attakki ‘bi preċiżjoni’ fuq il-miri partikulari fit-Tajwan u l-ibħra ta’ madwar din il-Gżira-Stat indipendenti.
L-eżerċizzji militari – li jikkonkludu għada t-Tnejn — huma intiżi bħala ‘twissija ħarxa’ lit-Tajwan u lill-President Tsai-ing Wen wara li hi żaret l-Istati Uniti u esprimiet l-apprezzament tat-Tajwaniżi għall-ħbiberija u l-għajnuna ta’ Washington.
Filwaqt li l-qawwiet Ċiniżi kienu qed jipprattikaw il-manuvri ostili madwar it-Tajwan, l-Istati Uniti bagħtet stqarrija biex tħeġġeġ liċ-Ċina għall-‘kawtela u sens ta’ kontroll’.
Is-simulazzjoni tal-qawwiet Ċiniżi, fl-aħħar sigħat, kienet tinvolvi mas-70 ajruplan tal-gwerra u numru ta’ bastimenti. Dan wara li l-ewwel mewġa tal-ajruplani ta’ Bejing kienet qasmet miz-zona tat-Taiwan Strait li sservi bħala ‘linja ta’ separazzjoni’ bejn it-Tajwan u ċ-Ċina,.
Min-naħa tagħhom, il-kelliema għall-Gvern Tajwaniż esprimew rabja għall-azzjonijiet provokattivi u sostnew li l-qawwiet tad-difiża tagħhom jinsabu fuq sitwazzjoni ta’ allert kontinwa.
