Ir-Renju Unit u l-Italja qed jikkundannaw bla riservi l-azzjonijiet vjolenti ta’ tmiem il-ġimgħa l-oħra li fihom inqatlu żewġt aħwa Britanniċi waqt attakk fix-Xatt tal-Punent — b’raġel Taljan ukoll jitlef ħajtu f’inċident ieħor li seħħ f’Tel Aviv, f’Iżrael.
L-attakk fix-Xatt tal-Punent seħħ matul il-Ġimgħa l-Kbira u ż-żewġ vittmi kienu identifikati bħala Maia u Rina Dee, Britanniċi ta’ nisel Iżraeljani, li spiċċaw mira ta’ aggressuri viċin iz-zona ta’ Hamra fil-Wied tal-Ġordan.
Dan meta grupp ta’ irġiel li ma kenux identifikati sparaw għal fuq l-aħwa waqt li kienu qed isuqu l-karozza fid-direzzjoni ta’ Tiberias. Fl-istess karozza kien hemm l-omm tal-aħwa li spiċċat feruta u qed tinżamm l-isptar f’kundizzjoni kritika.
Il-Prim Ministru Iżraeljan, Benjamin Netanyahu fisser l-attakk bħala azzjoni terroristika u bagħat il-kondoljanzi tiegħu lill-familja tal-vittmi.
Min-naħa tiegħu, is-Segretarju Britanniku għall-Affarijiet Barranin, James Cleverly, ikkuntattja lil Eli Cohen, il-Ministru Iżraeljan bl-istess dekasteru, biex jaġġorna ruħu dwar is-sitwazzjoni wara l-attakk. Cleverly wissa wkoll biex il-Britanniċi fix-Xatt tal-Punent jikkuntattjaw lill-Foreign Office f’każ li jħossuhom mhedda.
Xokk wara t-terrur f’Tel Aviv
Sadanittant, il-politiċi f’Iżrael u l-Italja esprimew xokk u kundanna għall-qtil, fi tmim il-ġimgħa, ta’ raġel Taljan waqt azzjoni terrorista fil-belt ta’ Tel Aviv, f’Iżrael. It-Taljan spiċċa l-vittma ta’ ċiklu ta’ vjolenza li qed tiżdied fil-Lvant Nofsani, bil-Gvern Taljan jidentifika lill-maqtul bħala Alessandro Parini, avukat minn Ruma li kien f’Iżrael għall-btajjel tal-Għid.
Żewġ Taljani oħra spiċċaw fost seba’ midruba fl-azzjoni partikulari fejn aggressur baqa’ dieħel bil-karozza għal fuq in-nies mexjin f’inħawi maġenb il-baħar. It-Taljani mhumiex f’periklu li jitilfu ħajjithom, b’Iżrael itenni li l-aggressur spiċċa ‘newtralizzat’.
Il-Prim Ministru tal-Italja, Giorgia Meloni, esprimiet solidarjetà mal-vittmi tal-avukat maqtul waqt li l-President Taljan Sergio Matttarella ikkundanna bl-aktar mod qawwi ‘l-att ta’ terroriżmu mwettaq minn qattiel kodard’.
