Il-Papa Franġisku, fl-aħħar ħinijiet, ippresieda fuq il-Quddiesa ta’ Ħadd il-Għid fi Pjazza San Pietru u li għaliha attendew ‘il fuq minn 45,000 devoti.
U filwaqt li l-Kap tal-Kattoliċi, din id-darba, ma wassalx l-Omelija tal-Għid tradizzjonali, il-vera messaġġ kellu joħroġ proprju f’lejliet din il-festa ( is-Sibt) — fejn il-Papa, fuq kollox, ħeġġeġ biex il-Kristjani jħarsu ‘il quddiem b’fiduċja minkejja li d-dinja tinsab għaddejja minn kriżi għall-oħra,
L-Għid il-Kbir hi l-aktar festa ferrieħa tas-sena liturġika u l-Papa, waqt il-Vejla tas-Sibt, irrefera għall-qari mill-Bibbja li tesprimi l-ferħ tan-nisa li kienu żaru l-Qabar ta’ Kristu u sabu l-qabar vojt waqt li semgħu mingħand Anġlu li Ġesu kien rebbieħ fuq il-mewt.
Il-Papa sostna li l-iskrittura għandha timmotiva lill-Kristjani kollha biex jegħlbu s-sens tat-telf u d-disfatti filwaqt li jġeddu s-sens tat-tama huma u jħarsu lejn il-ġejjieni.
Hu saħaq li l-Kristjani jridu jieħdu l-eżempju ta’ Kristu li qam mill-mewt u biddel id-direzzjoni tal-istorja, filwaqt li rrefera mill-ġdid għall-Festa tal-Għid li tissimbolizza tiġdid u r-realizzazzjoni li Alla qiegħed fiċ-ċentru ta’ ħajjitna.
Minkejja li dam tlett ijiem l-isptar fejn kien trattat għall-bronkite, il-Papa ippresieda fuq kważi kull impenn pubbliku waqt l-iskeda intensiva tat-tlett ijiem tal-Għid.
L-uniku avveniment li kellu jsegwi mid-dar tiegħu fil-Vatikan kienet proprju l-Via Crucis li saret fil-Kolossew ta’ Ruma, matul il-Ġimgħa l-Kbira.
Dan wara li s-Santa Sede ikkonfermat li l-Papa Franġisku ma kienx se jattendi minħabba l-kesħa kbira fil-kapitali Taljana u l-fatt li hu kien għadu qed jirkupra mill-bronkite.
