Il-qawwiet ta’ Iżrael, fil-lejl tas-Sibt u l-Ħadd, laqtu diversi miri militari fis-Sirja b’ritaljzzjoni għall-isparar tar-rokits lejn it-territorji kontrollati mill-Iżraeljani.
Ir-rapporti qalu li l-Iżraeljani użaw l-artillerija u d-drones biex jolqtu kumpless militari u r-rocket launchers tas-Sirjani – li aktar qabel kienu sparaw missili lejn l-Għoljiet tal-Golan li ilhom mill-1967 annessi mal-artijiet ikkontrollati minn Iżrael.
L-uffiċjali f’Iżrael u s-Sirja qegħdin jgħidu li huma ‘interċettaw ħafna mill-missili sparati mill-għadu’ waqt l-azzjonijiet matul is-sigħat bikrija tal-Għid. Lanqas ma jidher li l-azzjonijiet rispettivi setgħu ħallew il-vittmi fuq iż-żewġ naħat.
Madankollu, il-media tas-Sirja, fl-aħħar sigħat, irrappurtat sensiela ta’ splużjonijiet qrib il-kapitali Damasku – u wara li kienu sparati r-rokits mit-territorji Sirjani lejn Iżrael.
Intant, l-istampa tal-Libanu qed tgħid li l-Brigati tal-Al-Quds – il-fergħa armata tal-Moviment Palestinjan tal-Ġiħad Iżlamiku ( appoġġjata mill-Iran) – kienet sparat il-missili lejn Iżrael. Dan waqt li l-Iżraeljani qalu li qed iżommu lis-Sirja responsabbli għal dawn l-azzjonijiet u li bl-ebda mod mhuma se jippermettu aġir li jista’ jabbuża lis-sovranità ta’ Iżrael.
