L-Assistent Kummissarju, Ramon Mercieca, irreżenja mill-pożizzjoni tiegħu fil-bord tal-FIAU – jumejn biss wara li ġie ppubblikat ritratt tiegħu jattendi l-gender reveal party ta’ Rosianne Cutajar.
F’rapport fit-Times of Malta intqal li Mercieca, kien jifforma parti minn dan il-bord f’isem l-Korp tal-Pulizija.
Intqal ukoll li l-Assistent Kummisarju ilu nieqes mix-xogħol tiegħu fil-korp dan hekk kif ilu fuq sick leave mill-25 ta’ Marzu.
Ir-ritratt ġie ppubblikat ftit jiem biss wara li l-ġurnalist Mark Camilleri żvela chats skandalużi bejn il-membru parlamentari Rosianne Cutajar, u l-akkużat primarju fil-qtil ta’ Daphne Caruana Galizia, Yorgen Fenech.
Sorsi li tkellmu mat-Times of Malta żvelaw li f’dan l-aħħar snin ġew implimentati diversi policies fil-kodiċi tal-etika tal-korp bl-għan li tissaħħaħ il-governanza tajba. Dan il-kodiċi, ma jispeċifikax li membri tal-korp ma għandomx jattendu festin personali ta’ politiċi, iżda għandu jsir dan b’responsabbiltà, u mingħajr preferenzi.
Mercieca, ġie inkarigat bħala Assistent Kummissarju fl-2021.
Din l-aħħar storja mill-qalba tal-Korp tal-Pulizija kompliet iżżid il-ferment li hemm bħalissa lejn it-tmexxija tal-Korp.
Ħafna għadhom ma jistgħux jifhmu kif Angelo Gafa baqa’ ma għamel xejn dwar il-fatti ġodda li ħarġu miċ-chats li ġew ippubblikati l-ġimgħa li għaddiet, speċjalment l-influwenza qawwija li kellu n-negozjant Yorgen Fenech fuq deputat Parlamentari – b’rigali u flus li għaddew lil Rosianne Cutajar, kif ammetiet hi stess. Dan meta kien diġà sar magħruf illi Fenech hu s-sid ta’ 17 Black.
