Colin Schembri
Mellieħa Libertas………74
Depiro……………………….63
(18-25)(16-15)(26-16)(14-7)
Se jkunu Mellieħa Libertas l-avversarji ta’ Starlites FIJO fil-finali għar-rebħ tal-kampjonat 2022/2023 f’ripetizzjoni tal-finali tal-istaġun li għadda. Dan wara li fit-tielet semi-finali deċisiva huma għelbu lil Depiro 74-63 biex rebħu s-serje 2-1. Il-partita fetħet bit-three pointers ta’ Mellieħa minn Robert Bonnici u Isaac Bonett. Depiro wieġbu bi break ta’ 12-2 bi trippla ta’ Miguel Brincat u l-punti ta’ Kameron Rooks. Mellieħa kellhom żewġ three pointers oħra minn Vukassin Jandric u Nenad Bukva u żewġ baskets oħra ta’ Bonett biex waslu sa’ punt ‘l bogħod 18-19. L-aħħar punti tat-taqsima ġew minn Depiro permezz ta’ Cameron Cornelius u Sean Galea għal skor ta’ 25-18. Fit-tieni sessjoni, kien hemm trippla fuq kull naħa qabel ma Depiro kabbru l-vantaġġ għal 9 punti. Mellieħa wieġbu permezz ta’ David Bugeja flimkien ma’ żewġ trippli ta’ Nikola Jovanovic però Depiro daħlu jistrieħu 38-34 minn fuq.
Fit-tielet sessjoni Mellieħa kellhom bidu tajjeb b’run ta’ 11-2 bi tlett three pointers minn Jandric, Bugeja u Sebastien Valencia biex ħadu l-vantaġġ. Għal xi ħin Depiro reġgħu ħadu l-vantaġġ wara trippla ta’ Cornelius u punti ta’ Rooks u Miguel Mallia. Mellieħa wieġbu bi break ta’ 8-2 u wara żewġ trippli oħra ta’ Bonnici żammew il-vantaġġ sa’ tmiem it-taqsima 60-56. Fl-aħħar perjodu, trippla minn Brincat wasslet lil Depiro sa’ punt ‘l bogħod 61-63. Bukva u Valencia għamlu żewġ baskets wara xulxin qabel ma Cornelius għamel l-aħħar punti ta’ Depiro. Mellieħa għalqu l-partita bi 8 punti mingħajr risposta, kollha minn Jandric b’żewġ three pointers biex ħarġu rebbieħa 74-63. L-appuntament issa għall-Ħamis 20 ta’ April fit-8.00 ta’ fl-għaxija għall-ewwel finali hekk kif il-kampjonati issa jagħmlu spazju għall-finali tan-Knock-outs nhar il-Ħadd 16 ta’ April.
Mellieħa Libertas: D. Bugeja 10, R. Bonnici 13, V. Jandric 16, I. Bonett 8, N. Bukva 7, N. Jovanovic 6, M. Formosa, O. Said, S. Valencia 14.
Depiro: S. Galea 4, J. Micallef, A. Attard, S. Kenely, K. Rooks 17, M. Brincat 6, M. Mallia 8, C. Cornelius 26, A. Micallef, M. Debattista, K. Caruana 2.
Referees: Bernard Vassallo ( Nicky Azzopardi), Gordon Barbara, Zvesdan Dobrosaviljevic.
