Il-maġistrati f’Napli, minn ħin għall-ieħor, se jiddeċiedu jekk Andrea Cozzolino, deputat Soċjalista fil-Parlament Ewropew, għandux ikun estradit lejn il-Belġju biex iwieġeb għall-akkużi li aċċetta t-tixħim mingħand ‘xi pajjiżi barranin’ biex jinfluwenza d-deċiżjonijiet ta’ dan il-Parlament.
Cozzolino ilu mill-2009 bħala MEP għan-naħa t’isfel tal-Italja u l-maġistrati f’Napli darbtejn ipposponew il-mandat għall-estradizzjoni tiegħu li issa qed tidher imminenti. Dan minħabba li l-istess maġistrati kienu qed jistennew aktar informazzjoni mingħand il-prosekuturi fil-Belġju.
Il-każ żviluppa b’mod mgħaġġel wara li rapport parlamentari, f’Jannar, sostna li Cozzolino kien suspettat ‘b’li tħallas il-flus biex jipproteġi l-interessi tal-Istati barranin fl-Assemblea Ewropea.’
U ftit jiem wara, il-prosekuturi ħarġu mandat għall-arrest ta’ dan l-MEP li kien validu għall-Ewropa kollha – bir-riżultat li Cozzolino spiċċa f’idejn il-pulizija qabel kien deċiż li hu jinżamm id-dar tiegħu taħt arrest.
L-avukat tal-MEP, Federico Conte, sadanittant, qed jgħid li l-mandat kontra l-klijent tiegħu hu wieħed vag u anki nieqes mit-trasparenza.
Conte qed jistaqsi, fost oħrajn, għad-dati u dettalji konkreti tal-allegata korruzzjoni u jekk il-klijent tiegħu tħallasx bi flus kontanti mingħand il-pajjiżi inkwistjoni jew jekk kienx hemm xi trasferiment tal-flus lejn kont bankarju fl-isem ta’ Andrea Cozzolino..
L-istess Cozzolino hu wieħed minn erba’ MEPs involuti fl-investigazzjoni magħrufa bħala Qatargate fejn qed ikun allegat li l-Qatar u l-Marokk ħallsu lil grupp ta’ persuni bażati fi Brussell biex jinfluwenzaw lid-deputati tal-Unjoni Ewropea.
Intant, Cozzolino u l-kelliema għat-tmexxija tal-Qatar qegħdin jiċħdu għall-allegazzjonijiet, bis-sorsi qrib il-Gvern tal-Marokk qed jikkundannaw ‘din is-sitwazzjoni ta’ persekuzzjoni fuq livell ġudizzjarju’.
Intant, l-Imħallfin, nhar it-Tlieta, iridu jiddeċiedu jekk Cozzolino, li għandu 60 sena, għandux ikun ittrasferit minn Napli lejn il-Belġju u f’liema każ għandu jinżamm f’kumpless ta’ ħabs skont il-Mandat għall-Arrest fuq bażi Ewropea.
