Il-Pulizija Amerikana qed tinvestiga l-qtil ta’ ħames persuni lwaqt sparatura f’fergħa ta’ bank fil-belt ta’ Louisville, fl-Istat ta’ Kentucky. Wieħed mill-vittmi hu l-aggressur issuspettat li ma kienx identifikat b’ismu u li jaħsbu kien eks-impjegat tal-Old National Bank, fejn seħħ il-massakru.

Intant, talanqas għaxra – fosthom żewġ uffiċjali tal-pulizija — spiċċaw midruba mill-aggressur u kellhom jittieħdu l-isptar għall-kura.

Il-bank inkwistjoni jinsab fl-inħawi ta’ East Main, bix-xhieda, wara, jinfurmaw lill-media li l-aggressur fetaħ in-nar fuq in-nies li kienu fis-sala tal-konferenzi tal-bank.

Il-Pulizija u s-suldati federali li wieġbu għall-emerġenza qalu li kienu qed jikkonfrontaw sitwazzjoni ta’ ‘active shooter’, bis-sitwazzjoni ddum biex tinġieb taħt kontroll. Intant, l-aggressur miet waqt konfront mal-pulizija u meta ma kienx ċert jekk hu qalax it-tiri fatali mingħand l-uffiċjali tal-liġi inkella jekk dawwarx l-arma tan-nar fuqu  nnifsu.

Dan wara li  l-membri tal-pubbliku kienu avżati biex iżommu ‘il bogħod miz-zona tal-bank waqt li l-qawwiet għaż-żamma tal-liġi kienu qegħdin janalizzaw iċ-ċirkustanzi.

Mal-pulizija armati ssieħbu anki l-aġenti tal-FBI li ċirkondaw iz-zona tal-bank u fuq il-post, aktar tard, wasal ukoll il-Gvernatur ta’ Kentucky, Andy Beshear.

Min-naħa tiegħu, is-Sindku ta’ Louisville, Craig Greenberg, irringrazzja lill-uffiċjali tas-sigurtà kollha li intervjenew fil-pront biex jindirizzaw l-emerġenza u li bl-azzjonijiet tagħhom evitaw aktar telf ta’ ħajja.