Il-Kremlin tar-Russja qed jinkwieta li kapaċi jitlef l-artijiet li għadu jikkontrolla fl-Ukrajna u f’liema sitwazzjoni għandu anki jitlef ħafna kredibbiltà f’għajnejn id-dinja u fost il-poplu Russu.
Fil-fatt, il-President tar-Russja, Vladimir Putin, hu konxju mill-effettività tar-reżistenza feroċi tal-qawwiet Ukreni u qed jagħmel li jista’ biex jipprepara għal kontro-offensiva mill-Armata tal-Ukrajna li qed tidher, ftit jew wisq, imminenti.
Filwaqt li l-ġlied qed ikompli fuq diversi fronti fl-Ukrajna, Vladimir Putin qed jissorvelja – minn Moska – it-tħaffir ta’ trinka twila ħafna fir-reġjun Ukren ta’ Zaporizhzhia li tfakkar fit-trinek tal-Ewwel Gwerra Dinjija.
Dan qed isir bħala linja ta’ difiża ewlenija kontra kull azzjoni mill-qawwiet Ukreni li fil-ġranet li ġejjin mistennija jirċievu dejjem aktar armamenti mingħand il-Punent.
It-trinka li qed tinbena tidher mill-ispazju u hemm diversi ritratti tal-fażijiet ta’ kostruzzjoni miġbudin bis-satellita.
Sadanittant, il-kelliema għall-Gvern Ukren qed jirridikolaw din il-miżura tar-Russja li skont huma tirrifletti l-inkwiet kbir ta’ Putin li, ‘il quddiem, ikollu jċedi anki l-inħawi ta’ Zaporizhzhia. Dan minkejja li Putin, xhur ilu, kien għaqqad dan ii-reġjun illegalment mal-Federazzjoni Russa.
Fl-istess ħin, it-tul tat-trinka li qed tinbena jirrifletti wkoll it-tħassib tar-Russi dwar id-distanzi li t-truppi tagħhom kapaċi jirtiraw jekk kemm-il darba tirnexxi kontro-offensiva kbira tal-Ukrani.
Vladimir Putin kien bagħat lit-truppi tiegħu fl-Ukrajna fi Frar tal-2022 u meta kien ċert li dan il-pajjiż kellu jikkrolla quddiem l-offensiva‘fi spazju ta’ ġimgħatejn’. Ix-xenarju baqa’ mhux irrealizzat, bil-konflitt jissarraf fl-umiljazzjonijiet għar-Russi fuq il-kampijiet tal-battalja, tant li l-President Russu qed jinkwieta li kapaċi jitlef anki l-artijiet li fadal taħt il-kontroll tal-Kremlin.
Sadanittant hemm rapporti li r-Russi, fil-jiem li jmiss, jistgħu wkoll iwettqu offensiva ġdida fuq numru ta’ zoni difiżi mill-Ukreni fl-artijiet tal-Lvant tal-Ukrajna.
