L-Istati Uniti u l-Filippini qed jorganizzaw l-akbar eżerċizzji militari konġunti fl-istorja, b’dan qed isir eżatt wara li ċ-Ċina konkludiet sensiela ta’ eżerċizzji simili madwar it-Tajwan.
Il-militar Ċiniż, għal tlett ijiem sħaħ, wettaq provi għal sitwazzjonijiet ta’ assedju fuq it-Tajwan, bl-azzjonijiet iservu bħala ‘tweġiba ċara’ lill-President tat-Tajwan Tsai Ing-wen wara li din żaret l-Istati Uniti matul il-ġimgħa li għaddiet.
Intant, l-Istati Uniti kritikat l-eżerċizzji taċ-Ċina bħala ‘sproporzjonati u barra minn lokhom’ waqt li l-Gvern Tajwaniż tenna li r-reġim f’Beijing qiegħed juri dejjem aktar aġir irresponsabbli f’sitwazzjoni sensittiva għall-aħħar.
L-eżerċizzji tal-Istati Uniti u l-Filippini kienu pjanati minn qabel u l-kelliema f’Washington u Manila qalu li l-istess eżerċizzji qegħdin juru impenn lejn iz-zamma tal-paċi u l-istabbilità fir-reġjun Indo-Paċifiku.
L-eżerċizzju mlaqqam Balikatan qed jinvolvi ‘il fuq minn 17,000 truppi, fosthom 12,000 tal-Istati Uniti. Intant, l-eżerċizzji se jinkludu prova ta’ tinvolvi l-qerda ta’ bastiment tal-gwerra finta fil-Baħar Ċiniż tan-Nofsinar u liema azzjoni kapaċi tqanqal għadab kbir min-naħa taċ-Ċina.
